Ukrayna prezidenti Volodimir Zelenski noyabrın 19-da Türkiyəyə səfər edəcəyini açıqlayıb. O, noyabrın 18-də İspaniyaya səfərindən sonra Türkiyəyə gedəcəyini bildirib.
"Danışıqları yenidən canlandırmaq istəyirik, tərəfdaşlarımıza təklif edəcəyimiz həll yollarını hazırlamışıq. Mümkün olan hər şeyi etməklə müharibənin sonunu yaxınlaşdırmaq Ukraynanın əsas prioritetidir", – Zelenski Türkiyədə keçirəcəyi görüşlərlə bağlı deyib.
Ukrayna prezidenti onu da bildirib ki, Kiyev hərbi əsirlərin mübadiləsini bərpa etmək üzərində də işləyir.
Ötən həftə Türkiyədə əsirlərin mübadiləsi üzrə dolayı danışıqların aparıldığı bəlli olub. Bu haqda Ukraynanın Milli Təhlükəsizlik və Müdafiə Şurasının rəhbəri Rustem Umerov məlumat verib.
Bu il İstanbulda iki raund Rusiya-Ukrayna danışıqları keçirilib və hər dəfə tərəflər hərbi əsir mübadiləsi üzrə razılığa gəliblər.
Moskvanın Ukraynada apardığı təcavüzkar müharibə 4 ilə yaxındır gedir, atəşkəs cəhdləri nəticəsiz qalıb.
Trampın xüsusi elçisi də gəlir
ABŞ-nin xüsusi elçisi Stiv Uitkoff da noyabrın 19-da Türkiyəyə gedəcək, Zelenski ilə planlaşdırılan danışıqlara qatılacaq. Bunu "Reuters" Türkiyədən bir mənbəyə istinadla yazır.
S.Uitkoff bu ilin fevralından Rusiya və Ukrayna təmsilçiləri ilə bir sıra görüşlərə qatılıb, bir neçə dəfə Rusiyaya gedib, prezident Vladimir Putinlə görüşüb. Zelenski onu bir neçə dəfə tənqid edərək deyib ki, Uitkoffun bəzi açıqlamalarında rusiyapərəst narrativlər səslənib.
Uitkoff Qəzza sektorunda girovların azad olunması, atəşkəs üzrə razılaşmanın bağlanmasında mühüm rol oynayıb. Onun səylərini İsrail və vasitəçi ölkələr yüksək qiymətləndirib.
Rusiya qatılmır
Rusiya təmsilçiləri noyabrın 19-da Türkiyədə Ukrayna ilə bağlı danışıqlara qatılmayacaq. Bunu Kreml bu gün – noyabrın 18-də bildirib.
Kremlin sözçüsü Dmitri Peskov jurnalistlərə deyib ki, "hələlik bu təmaslar Rusiyanın iştirakı olmadan aparılır".
Peskov onu da əlavə edib ki, prezident Vladimir Putin danışıqların nəticələri barədə ABŞ və Türkiyə ilə söhbətlərə açıqdır.
Putinin xüsusi elçisi Kiril Dmitriyev də İstanbulda görüşlərə qoşulmayacaq. "Reuters" bunu Dmitriyevə yaxın mənbəyə istinadla yazır: "Mənbənin sözlərinə görə, Dmitriyev oktyabrın 24-26-da ABŞ-də Stiv Uitkoff ilə çox məhsuldar müzakirələr aparıb".
ABŞ prezidenti Donald Tramp ötən ay Rusiyanın danışıqları ləngitdiyini deyib və buna cavab olaraq Rusiyanın neft nəhəngləri "Lukoil" və "Rosneft"ə sanksiya tətbiq edib.
