Vəkil Zabil Qəhrəmanov haqqında həbs qərarından verilmiş apellyasiya şikayətinə baxılıb. Oktyabrın 28-də Gəncə Apellyasiya Məhkəməsində bu iş üzrə proses təxminən beş saat çəkib. Saat 21:30 radələrinədək davam edən məhkəmənin yekununda isə vəkil haqqında həbs qərarının qüvvədə saxlandığı açıqlanıb.
AzadlıqRadiosunun məlumatına görə, məhkəmədə təqsirləndirilən vəkil özü də, onun müdafiəçisi olan həmkarları da çıxış edib. Vəkillər Z.Qəhrəmanovun təqsirsiz olduğunu vurğulayıb, onun barəsində başlanmış cinayət işinin də, ardından Gəncə şəhər Məhkəməsində verilən həbs qərarının da qanunsuz və əsassız olduğunu bildiriblər.
Polisdə vətəndaşların başına açılan oyunlar...
Z.Qəhrəmanov özü də ona qarşı irəli sürülmüş xuliqanlıq və dələduzluq ittihamlarını rədd edib. O bildirib ki, vəkil kimi, prinsipial fəaliyyətinə, Gəncə şəhər Baş Polis İdarəsində vətəndaşların başına açılan oyunları açıqladığına görə cəzalandırılıb.
Müstəntiq isə çıxışında apellyasiya şikayətinin təmin olunmamasını, həbs qərarının qüvvədə saxlanmasını istəyib. O iddia edib ki, Z.Qəhrəmanov istintaq dövründə azadlıqda qalsa, şahidlərə təsir göstərmək, istintaqdan yayınmaq ehtimalı var.
Çıxışlardan sonra Əlizamin Abdullayevin sədrlik etdiyi hakimlər kollegiyası apellyasiya şikayətinin təmin olunmadığını, Gəncə şəhər Məhkəməsinin qərarının qüvvədə saxlandığını elan edib.
İttihamlar
Gəncə Regional Vəkil Bürosunda fəaliyyət göstərən Zabil Qəhrəmanov oktyabrın 23-də Gəncə şəhər Baş Polis İdarəsinin əməkdaşları tərəfindən saxlanılıb. Öncə ona qarşı Cinayət Məcəlləsinin 221.2.2 (xuliqanlıq - ictimai qaydanın pozulmasının qarşısını alan şəxsə müqavimət göstərməklə törədildikdə) maddəsi ilə ittiham irəli sürülüb. İddia olunub ki, elə həmin gün avtoyuma məntəqəsində işləyən Fazil İsgəndərovla mübahisə edib, onu vurub.
Ardından Z.Qəhrəmanova CM-in 178.2.4 (dələduzluq - xeyli miqdarda ziyan vurmaqla törədildikdə) daha bir ittiham elan edilib. İddia olunub ki, vəkil saxlandığı gün Şəmkir sakini Emin İbrahimov da Gəncə şəhər Baş Polis İdarəsinə ondan şikayət edib. İddia olunur ki, Z.Qəhrəmanov ona vəkillik edib və prosesin onun istədiyi kimi başa çatacağına söz verərək 5 min 600 manat pul alıb.
Z.Qəhrəmanov isə hər iki ittihamın əsassız olduğunu, onu cəzalandırmaq üçün adları çəkilən şəxslərdən istifadə edildiyini deyir.
Həbsindən təxminən iki həftə öncə - oktyabrın 8-də Daxili İşlər Nazirliyindən gələn şikayət əsasında Vəkillər Kollegiyasının Rəyasət Heyətinin qərarı ilə Z.Qəhrəmanovun vəkillik fəaliyyətinin 6 aylıq dayandırılmasına qərar verilmişdi.
Z.Qəhrəmanov bir sıra səs-küylü işlərdə müdafiəçi qismində çıxış edib. O, Tovuz rayonunun Dondar Quşçu kəndində 11 yaşlı Nərmin Quliyevanın oğurlanıb meyitinin yandırılmasında suçlanan İlkin Süleymanovun, qətl ittihamı ilə 11 il cəza alıb 4 il sonra bəraət hökmü ilə azadlığa çıxan Polad İsmayılovun, Tərtər hadisələrində bir neçə zərərçəkmişin və bir sıra ictimai-siyasi fəalların vəkili olub.
