Çapı dayanan "Azadlıq" qəzetinin hazırda mühacirətdə olan baş redaktoru Qənimət Zahid Baş Prokurorluğa çağrılıb.
Bununla bağlı Baş Prokurorluğun rəsmi müraciəti İctimai Televiziyada yayımlanıb. Bildirilib ki, o, barəsində açılmış cinayət işi üzrə bitmiş ibtidai istintaqla bağlı ittiham aktı ilə tanış olması üçün noyabrın 24-də Baş Prokurorluğun İstintaq Baş İdarəsinə çağrılır.
Q.Zahid Cinayət Məcəlləsinin 281.2-ci (Dövlət əleyhinə yönələn açıq çağırışlar, təkrar və ya bir qrup şəxs tərəfindən törədildikdə) maddəsi ilə təqsirləndirilir. Onun barəsində Səbail rayon Məhkəməsinin qərarı ilə 4 aylıq qiyabi həbs-qətimkan tədbiri seçilib.
Q.Zahid 2007-ci ildə Azərbaycanda həbs olunmuşdu. O, xuliqanlıq ittihamı ilə 4 il müddətinə azadlıqdan məhrum edilmişdi. 2010-cu ildə əfv sərəncamı ilə azadlığa buraxılıb. Hazırda o, mühacirətdədir.
Q.Zahid ona olan ittihamları qəbul etməyib.
14 noyabr
Tarixçi Altay Göyüşov, politoloq Ərəstun Oruclu da prokurorluğa çağrılıb
Tarixçi Altay Göyüşov Baş Prokurorluğa çağrılıb. Bununla bağlı qurumun rəsmi müraciəti İctimai Televiziyada yayımlanıb.
Məlumata görə, A.Göyüşov bu il noyabrın 21-də 12:00-da Baş Prokurorluğun İstintaq Baş İdarəsinə gəlməlidir.
A.Göyüşov Cinayət Məcəlləsinin 281.2-ci (Dövlət əleyhinə yönələn açıq çağırışlar, təkrar və ya bir qrup şəxs tərəfindən törədildikdə) maddəsi ilə təqsirləndirilir. Haqqında axtarış elan olunub.
Bildirilir ki, Binəqədi rayon Məhkəməsinin bu il fevralın 23-də verdiyi qərarı ilə barəsində qiyabi həbs-qətimkan tədbiri seçilib.
Bu açıqlamaya və ittihama A.Göyüşovun özü münasibət bildirməyib.
Hakimiyyətə tənqidi mövqeyi ilə seçilən tarix elmləri namizədi A.Göyüşov hazırda xaricdə yaşayır. Bakı Dövlət Universiteti və Siyasi Araşdırmalar İnstitutunda çalışıb. Müsavat Partiyasında təmsil olunub, ReAL Hərəkatının yaradıcılarından olub, hər iki qurumu tərk edib. A.Göyüşov hazırda Parisdəki "Sciences-Po" Universitetində elmi işçi kimi çalışır.
Ərəstun Orucluya da növbə çatdı
Hazırda ABŞ-də yaşayan politoloq Ərəstun Oruclunun da Baş Prokurorluğa çağrıldığı açıqlanıb. Onun isə noyabrın 21-də saat 14:00-da həmin qurumda olması istənilir.
Binəqədi rayon Məhkəməsinin bu il fevralın 23-də verdiyi qərarla Ə.Oruclu barəsində qiyabi həbs-qətimkan tədbiri seçilib.
"Sentyabrın 18-də ittihamın məzmununa əlavələr və dəyişikliklər edilərək Ərəstun Oruclunun CM-nin 220.2-ci (...kütləvi iğtişaşlara, habelə vətəndaşlara qarşı zorakılıq etməyə çağırışlar) və 281.2-ci (Dövlət əleyhinə yönələn açıq çağırışlar, təkrar və ya bir qrup şəxs tərəfindən törədildikdə) maddələri ilə təqsirləndirilən şəxs qismində istintaqa cəlb olunması haqqında qərar qəbul edilib", - Baş Prokurorluğun məlumatında bildirilir.
"Şərq-Qərb" Araşdırmalar Mərkəzinə rəhbərlik edən Ə.Oruclu Azərbaycan Milli Təhlükəsizlik Nazirliyində də fəaliyyət göstərib. Hakimiyyətə tənqidi mövqeyi ilə seçilir.
"Gəlib prokurorluğa onların nə sualı var cavab verəcəm"
Baş Prokurorluğun açıqlamasından sonra politoloq Ə.Oruclu ona yönələn ittihama qarşı çıxıb: "Mən heç vaxt hansısa çevrilişə, üsyana, nə bilim, nəyə çağırış etməməmişəm. Əksinə, hər zaman demişəm ki, bu pisdir".
"Bu məsələnin hüquqi tərəfi. Amma Azərbaycanda hüquqdan danışmaq belə cəfəngiyatdır. Biz illərdir Azərbaycanda hansı cinayətlərin törədilməsini və o cinayəti törədənlərin necə mükafatlandırılmasını görürük", - o əlavə edib.
Bununla belə, Ə.Oruclunun sözlərinə görə, şəxsən gözləməyib ki, ona qarşı da belə bir addım atılar.
O, baş verənləri "özünü itirmək" kimi dəyərləndirib.
Ə.Oruclu vurğulayıb ki, o, siyasi mühacir deyil: "Gəlib prokurorluğa onların nə sualı var cavab verəcəm. Amma onlar da mənim suallarıma cavab verəcəklər".
13 noyabr
Jurnalist Sevinc Osmanqızı Baş Prokurorluğa çağrılıb
Birləşmiş Ştatlarda (ABŞ) yaşayan jurnalist Sevinc Osmanqızı noyabrın 20-si saat 16:00-da Baş Prokurorluğun İstintaq Baş İdarəsinə çağrılıb.
İTV-də bununla bağlı Baş Prokurorluğun müraciəti yayımlanıb. Məlumata görə, ona rəsmi bildiriş göndərilib.
Bildirilir ki, fevralın 23-də S.Osmanqızıya Cinayət Məcəlləsinin 220.2 (...kütləvi iğtişaşlara, habelə vətəndaşlara qarşı zorakılıq etməyə çağırışlar) və 281.2-ci (Dövlət əleyhinə yönələn açıq çağırışlar) maddələri ilə rəsmi ittiham irəli sürülüb və o, axtarışa verilib.
Baş Prokurorluq Osmanqızıya xəbərdarlıq edib ki, çağırışa gəlmədiyi halda, barəsində qiyabi hökm və ya məhkəmənin digər yekun qərarı çıxarıla bilər.
"Osmanqızı TV" kanalındakı çıxışları ilə bağlı xaricdə yaşayan Beydulla Manafov və Abid Qafarov da oxşar ittihamlarla üzləşiblər. Baş Prokurorluq onların da həmin tarixdə istintaqa gəlmələrini tələb edir. Məlumata görə, Qafarovun CM-in 220.2 və 281.2-ci, Manafovun isə 281.2 və 283.1-ci (Milli, irqi, sosial və ya dini nifrət və düşmənçiliyin salınmasına yönələn hərəkətlər) maddələri ilə təqsirləndirilən şəxs qismində istintaqa cəlb olunması barədə qərar qəbul edilib.
Sevinc Osmanqızı: 'Bu, sözdən qorxudur'
Prokurorluğun açıqlamasından sonra jurnalist Sevinc Osmanqızı deyib ki, bu, ondan ötrü gözlənilməz olmayıb: "Əgər sən bir Youtube kanalının aparıcısısansa, hər gün efirdəsənsə və rejimin maraqlarına toxunursansa, potensial hədəfsən".
İttihamları qəbul etməyən S.Osmanqızı vurğulayıb ki, "bu, sözdən qorxudur".
O əlavə edib ki, SSRİ-də ötən əsrin 37-ci, 38-cı illərindəki repressiyalarda güllələnənlər olub və sonradan onlara bəraət verilib: "Gün olacaq bu İctimai TV-də bizlərə də bəraət oxunacaq. Çünki bizim, həbsdə yatan jurnalistlərimizin heç bir günahı yoxdur".
A.Qafarov və B.Manafovdan bu məsələyə, hələlik, ayrıca münasibət almaq mümkün olmayıb. Lakin onların da ittihamla razılaşmadıqları bildirilir.
Baş Prokurorluq bundan əvvəl də xaricdə fəaliyyət göstərən bir çox bloqer və internet televiziyalarının təmsilçilərini oxşar ittihamlarla istintaqa çağırıb, onların haqqında qiyabi həbs qərarları verib.
Xatırlatma
"Osmanqızı TV" internet kanalı 2018-ci ildən fəaliyyətdədir. S.Osmanqızı daha əvvəl BBC radiosu və ANS televiziyasında da çalışıb. Son illər o, hakimiyyətə yaxın bəzi media orqanlarında sərt tənqid və təhqiramiz ifadələrin hədəfinə çevrilib.
"KİM" internet televiziyasının əməkdaşı olan Abid Qafarov Azərbaycanda olarkən həbs həyatı yaşayıb. 2022-ci il iyulun 13-də Yasamal rayon Məhkəməsinin qərarı ilə 1 il müddətə azadlıqdan məhrum edilmişdi. O, çıxışlarında müharibə veteranlarına qarşı böhtan və təhqirdə günahlandırılırdı. Müdafiə tərəfinə görə, Qafarov internetdəki çıxışında veteranları təhqir etməyib, sadəcə ad çəkmədən öz hüquqları uğrunda mübarizə aparmadıqlarına görə onları qınayıb. Qafarov da özünü təqsirli bilmir və "Tərtər işi"ni araşdırdığına görə sifarişlə həbs olunduğunu bildirirdi.
Hazırda ABŞ-də yaşayan Beydulla Manafov "Turan TV" və xaricdən yayımlanan bir sıra internet televiziyalarında tənqidi mövqeyi ilə diqqət çəkir.
