Rusiyalı soprano Anna Netrebkonun Britaniyanın Kral Opera Evində gözlənən çıxışı Kiyevin tənqidinə, Londonda etirazlara səbəb olub. Bu, həm də Moskvanın Ukraynaya qarşı hücumlarının intensivləşməsi fonunda baş verir.
Netrebko sentyabrın 1-dən başlayaraq dörd gecə Cakomo Puççininin "Toska" əsərində baş rolu ifa etməlidir. Rusiya və Avstriya vətəndaşlığı olan Netrebko dekabrda eyni məkanda "Turandot"da çıxış edəcək, qışda isə solo çıxışı nəzərdə tutulub.
Vaxtilə separatçıların bayrağını tutub, liderləri ilə şəkil çəkdirib
AzadlıqRadiosunun Ukrayna xidmətindən Rostislav Xotin yazır ki, məsələ sopranonun Rusiya prezidenti Vladimir Putinlə əlaqələri, həmçinin onun keçmişdə Moskvanın Ukraynaya qarşı işğalına dair mövqeyi ilə bağlıdır.
Rusiya 2022-ci ilin fevralında tammiqyaslı işğala başlayandan bir neçə həftə sonra Netrebko Ukraynaya qarşı müharibəni pisləyib, amma Putini birbaşa tənqid etməyib.
Ukraynada və xaricdəki tənqidçilər deyirlər ki, Ukraynada milyonların əziyyət çəkdiyi bir vaxtda Kral Balet və Operası Netrebkonu dəvət etməklə yanlışa yol verib. Onlar sopranonu Rusiya Ukraynanın şərqini və cənubunu işğal edərkən onu dəstəkləməkdə ittiham edirlər. 2014-cü ildə o, Donetsk vilayətində Kiyevə qarşı çıxan qüvvələrin liderləri ilə birgə şəkil çəkdirib, separatçıların bayrağını qaldırıb.
Netrebko Putini 2012-ci il prezident seçkisində dəstəkləyib, onunla dəfələrlə görüşüb, dövlət mükafatları alıb. Ukrayna 2023-cü ildə onu sanksiya siyahısına salıb.
"Bu ifaçının on illərlə minlərlə ukraynalı uşağın ölümünə görə məsuliyyət daşıyan Vladimir Putinlə yanaşı dayandığını xatırlayırıq", – Ukrayna ordusunun keçmiş komandanı, hazırda Böyük Britaniyada səfir olan Valeri Zalujnı Britaniyanın "Daily Mail" qəzetində yazıb.
O, Netrebko kimi incəsənət adamlarının Kremlin "yumşaq gücü" olduğunu deyib.
Avqustun 14-də "The Guardian" Ukrayna, Britaniya və ABŞ-dən bir sıra ictimai xadimlərin məktubunu dərc edib.
"Royal Opera Evinin uzun illər ağır müharibə cinayətlərinə görə məsuliyyət daşıyan bir rejimin mədəniyyət təbliğatının simvolu olmuş sənətçini - Anna Netrebkonu əsas rollarda səhnəsinə dəvət etməsinə böyük ağrıyla şahid oluruq", – 50-dən çox xadimin imzaladığı məktubda yazılıb.
Sentyabrın 7-də Londonda Kral Opera Evinin qarşısında yüzlərlə adam etiraza çıxaraq tamaşanın ləğvinə çağırıb.
Opera Evinin mövqeyi
"Daim aydın şəkildə demişik ki, rusiyalı olmaq Kremldəki indiki rejimlə bağlılıq demək deyil", – bunu Opera Evinin sözçüsü apreldə AFP-yə demişdi. Onda Netrebkonun tamaşalarının anonsu təzə verilmişdi.
"Anna Putinin Ukraynadakı müharibəsini pisləyib, 2022-ci ildən bəri Rusiyaya qayıtmayıb", – sözçü əlavə edib.
Opera Evinin musiqi direktoru, çexiyalı dirijor Yakub Qruşa bildirib ki, Netrebkonu Londona o dəvət edib, çünki Opera Evi "ən yaxşı" ifaçılarla əlaqəli olmalıdır.
Netrebko 2022-ci il martın 30-da Facebook postunda yazıb: "Ukraynaya qarşı müharibəni qətiyyətlə pisləyirəm, fikirlərim müharibə qurbanları, onların ailələrinin yanındadır".
O həmçinin heç bir siyasi partiyanın üzvü, Rusiyanın hər hansı lideri ilə bağlılığı olmadığını, Putinlə yalnız bir neçə dəfə görüşdüyünü deyib.
Netrebko 2006-cı ildən Vyanada yaşayır.
İndiyədək onun Münhendə, Nyu-Yorkda, Tayvanda və Praqada konsertləri etirazlardan sonra təxirə salınıb. 2023-cü ildə isə Milanda konserti baş tutub.
54 yaşlı A.Netrebko azərbaycanlı tenor Yusif Eyvazovla 10 il evli olub. Onların ötən il boşandığı bildirilir. Y.Eyvazov 2023-cü ildən Azərbaycan Dövlət Akademik Opera və Balet Teatrının direktorudur.
