Daxili İşlər Nazirliyin (DİN) Qida Təhlükəsizliyi Agentliyi (AQTA) ilə birgə dabaq xəstəliyinə qarşı dərman preparatlarının saxta nümunələrini hazırlayanlarla bağlı əməliyyat keçirdiyi bildirilir.
Nazirliyinin oktyabrın 28-də yayılan açıqlamasına görə, tədbir zamanı qeyd edilən qanunsuz əməllərə yol verməkdə şübhəli sayılan iki şəxs saxlanıb: "... İnşaatda istifadə olunan rəngli boyalar dərman görüntüsü yaratmaq üçün texniki spirtlə qarışdırılaraq qablaşdırılıb. Daha sonra hazırlanan məhlul dabaq əleyhinə dərman vasitəsi kimi satışa çıxarılıb".
Vurğulandığına görə, Qaradağ rayonunda yerləşən sexə baxış zamanı kustar üsulla hazırlanan saxta dərman preparatları və sair sübutlar aşkarlanıb: "Saxlanılan şəxslərdən götürülən maddi sübutların ekspertizası zamanı onların dabaq xəstəliyinin müalicəsində effektsiz olduğu müəyyən edilib".
İddialara rəsmi açıqlamada adları çəkilən şəxslər və ya onların vəkillərindən münasibət almaq mümkün olmayıb.
23 oktyabr
Heyvan kəsimi mağazalarında monitorinq: 453-də soyuducu yoxdur...
Azərbaycandakı bir çox heyvan kəsimi və ət satış məntəqələrində soyuducuların olmadığı bildirilir.
Bu barədə Azərbaycan Qida Təhlükəsizliyi Agentliyi (AQTA) məlumat yayıb.
Qurum dünən, oktyabrın 22-nə kimi 4652 heyvan kəsimi və ət satışı mağazasında monitorinq keçirildiyini bildirir: "Monitorinq zamanı 698 heyvan kəsimi və ət satışı mağazası ilə bağlı inzibati tədbir görülüb, 65-də isə qanunsuz heyvan kəsimi ilə əlaqədar quraşdırılmış qurğular (11-i təkrar quraşdırılmış qurğulardır) sökülüb. Bundan başqa, 1244 halda ətlərin soyuducuda (453-də soyuducu yoxdur) saxlanılmadığı, 1277 halda isə ətlərin baytarlıq sənədi olmadan satışının həyata keçirildiyi müəyyən edilib ki, bununla bağlı icrası məcburi göstərişlər verilib".
AQTA heyvan kəsimi və ət satış mağazaları ilə bağlı hər hansı ünvan göstərməyib. İnzibati tədbir görülən mağaza sahiblərinin iradlara münasibətini öyrənmək mümkün olmayıb.
Xatırlatma
Son aylar Azərbaycanın əksər bölgələrində heyvanlar arasında kütləvi dabaq xəstəliyinin yayıldığı, bir sıra tələfat hallarının baş verdiyi bildirilir. Zərərçəkən fermerlərin bəziləri iddia edirlər ki, xəstəliyin aşkarlanmasından öncə heyvanları dabaq əleyhinə peyvənd də etdiriblər. Azərbaycanda dabaq əleyhinə peyvəndlər pulsuzdur.
Baş dövlət baytarlıq müfəttişinin imzaladığı qərara əsasən, Azərbaycanda fəaliyyət göstərən heyvan bazarlarında bu il oktyabrın 25-dən etibarən sağlamlaşdırma tədbirlərinin görülməsi üçün mərhələli şəkildə müvəqqəti məhdudiyyətlər tətbiq olunub.
