Əfqan Sadıqov 14 günlük inzibati qaydada həbs olunub.
AzadlıqRadiosunun gürcü xidmətinin məlumatına görə, bu qərar oktyabrın 23-də Tbilisi şəhər Məhkəməsində verilib.
Məhkəmədə Gürcüstan Daxili İşlər Nazirliyinin nümayəndəsi iddia edib ki, Ə.Sadıqov şəhər mərkəzində etiraz aksiyasında iştirakı zamanı yolu bağlayıb. O bildirib ki, polis onun və digər iştirakçıların yolu boşaltmasını əmr etsə də, onlar əmrə tabe olmayıblar.
Ə.Sadıqov etiraz aksiyasına çıxmasını müdafiə edib: "Mən hüquqları pozulan gürcü xalqının tərəfdarıyam. İvanişvili diktaturanı dəstəkləyir, mən isə xalqı".
O, hakimə bildirib ki, hər gün parlament binasının qarşısında keçirilən etiraz aksiyasına gedib: "Əlavə edəcəyim heç nə yoxdur, buradan çıxan kimi yenə mitinqə gedəcəyəm...".
Proses zamanı "İvanişvili diktatordur!" şüarlarını səsləndirən Ə.Sadıqov məhkəmə zalından çıxarılıb.
Əfqan Sadıqov Tbilisidə saxlanılıb
Əfqan Sadıqov Tbilisidə inzibati qaydada saxlanılıb. Bu barədə AzadlıqRadiosunun gürcü xidməti məlumat yayıb.
Ə.Sadıqovun həyat yoldaşı Sevinc Sadıqovanın daha öncə dediyinə görə, jurnalist parlament binası qarşısında keçiriləcək aksiyaya getmək istəyirmiş, ancaq evdən çıxdıqdan sonra əlaqə saxlamaq mümkün olmayıb. Bir neçə saat ərzində ailəsi və hüquq müdafiəçiləri onun yerini müəyyənləşdirməyə çalışıblar. Son günlər həyat yoldaşının izlənildiyini deyən S.Sadıqova baş verənləri "Əliyev və İvanişvili rejimlərinin növbəti siyasi repressiyası" adlandırıb.
Sadıqova hüquqi yardım göstərən Sosial Ədalət Mərkəzinin direktoru Tamta Mikeladze jurnalistin saxlanılması faktını təsdiqləyib. Onun sözlərinə görə, jurnalistin yaşadığı binanın qarşısındakı müşahidə kamerası məhz onun evi tərk etdiyi anda söndürülüb.
Ə.Sadıqovun Rustaveli prospektinin "qanunsuz" bağlanması ittihamı ilə saxlanıldığı ehtimal olunur.
Ailəsi Əfqan Sadıqovun taleyindən narahatdır
"AzelTV"nin hazırda Gürcüstanda yaşayan təsisçisi Əfqan Sadıqovdan ailəsi xəbər tuta bilmir.
Bu barədə onun həyat yoldaşı Sevinc Sadıqova məlumat yayıb. Onun vurğulamasına görə, bu gün, oktyabrın 22-də Ə.Sadıqov Gürcüstanda keçirilən etiraz aksiyasına, 329-cu gündür davam edən etirazlara qatılmaq üçün parlamentin qarşısına getməli idi: "Lakin evdən çıxdıqdan sonra onunla heç bir əlaqə saxlamaq mümkün olmadı. Dünən və ondan əvvəlki gün isə Əfqan mənə bildirmişdi ki, izlənir".
Hələlik, məsələyə Gürcüstanın hüquq-mühafizə orqanlarından münasibət almaq mümkün olmayıb.
Gürcüstanda son seçkilərdən sonra tez-tez kütləvi aksiyalar keçirilir. Xüsusilə "xarici agent" haqqında qanunun qəbulu, həmçinin, Avropa İttifaqına üzvlük məsələsinin 2028-ci ilə qədər dayandırması böyük etirazlara səbəb olub. Qərb ölkələri də bu respublikanın rəsmilərinə qarşı sanksiyalara başlayıb. Müxalifət arasında saxlananlar, həbs edilənlər var.
Əfqan Sadıqovun bundan əvvəl həbsi
Ə.Sadıqov bu il aprelin 16-da təqribən 8 aylıq həbsdən sonra məhkəmənin qərarı ilə həbsdən buraxılıb. Məhkəmə onu 5 min lari (3 min manat) məbləğində girov qarşılığında azadlığa buraxmışdı.
Ə.Sadıqov 2023-cü ilin dekabrında ailəsi ilə birlikdə Gürcüstana gəlib. Ötən ilin iyulunda o, Gürcüstandan Türkiyəyə buraxılmadığını söyləyib. Avqustda Azərbaycanın sorğusu ilə Ə.Sadıqov həbs edilib. Bakıda o, pul tələb etməkdə ittiham olunur və ekstradisiyası istənirdi. Gürcüstan hakimiyyəti ona siyasi sığınacaq verməkdən imtina etmişdi. 2024-cü il noyabrın 28-də Tbilisi şəhər Məhkəməsi Ə.Sadıqovun Azərbaycana ekstradisiyası haqqında qərar qəbul etmişdi. Lakin qərar icra edilməmişdi. Ə.Sadıqov ittihamı qurama sayırdı.
Xatırlatma
"AzelTV"nin təsisçisi və baş redaktoru Ə.Sadıqov daha əvvəl, 2016-cı il noyabrın 22-də isə Azərbaycanda saxlanmışdı. Ona Cinayət Məcəlləsinin 127.2.3-cü (xuliqanlıq niyyəti ilə təhlükəli üsulla sağlamlığa qəsdən az ağır ziyan vurma) maddəsi ilə ittiham irəli sürülmüşdü. O, icra hakimiyyətində bir qadına xəsarət yetirməkdə ittiham edilirdi. Ancaq Ə.Sadıqov ittihamı qəbul etmir, işi qurama sayırdı. 2017-ci il yanvarın 12-də Cəlilabad rayon Məhkəməsi onu 2 il yarım müddətinə azadlıqdan məhrum etmişdi. Həmin ilin noyabrında isə Ali Məhkəmə Ə.Sadıqovun cəza müddətini 2 il yarımdan 1 il yarımadək azaltmışdı. O, 2018-ci il mayın 23-də azadlığa çıxmışdı.
Azadlığa çıxdıqdan sonra da o, polisin qanuni tələbinə əməl etməməkdə günahlandırılaraq 30 sutka həbs cəzası almışdı. Ə.Sadıqov onda da ittihamı qəbul etmirdi.
