Rusiya və Azərbaycan eyni vaxtda iki məhbusu azad edib
"Sputnik-Azərbaycan" xəbər agentliyinin ev dustaqlığına buraxılan şef-redaktoru Yevgeni Belousov oktyabrın 25-də Bakıdan Rusiyaya uçub.
Məlumatı Rusiya Xarici İşlər Nazirliyinin (XİN) sözçüsü Mariya Zaxarova təsdiqləyib.
"Minval" portalı, öz növbəsində, Yusif Xəlilovun Rusiyada həbsdən azad olunduğunu bildirir. Nəşr onu Voronejdəki Azərbaycan diasporunun lideri və şəhərin ən böyük bazarının sahibi kimi təqdim edir.
24 oktyabr
'Sputnik-Azərbaycan'ın şef redaktoru ev dustaqlığına buraxılıb
Daxili İşlər Nazirliyinin "Rossiya Seqodnya" İnformasiya Agentliyinin Bakı filialında (Sputnik-Azərbaycan) keçirdiyi əməliyyat-axtarış tədbirləri nəticəsində saxlanan şef redaktor Yevgeni Belousov haqqında həbs qərarı dəyişdirilib. Y.Belousov barəsində 3 aylıq ev dustaqlığı qətimkan tədbiri seçilib.
Yerli saytların məlumatına görə, bununla bağlı oktyabrın 24-də Xətai rayon Məhkəməsində qərar qəbul olunub.
Bir qədər əvvəl "Sputnik-Azərbaycan"ın Bakıda həbsdə olan icraçı direktoru İqor Kartavıx da azadlığa buraxılıb. O, daha sonra Rusiyaya yola salınıb.
Putin Əliyevə zəng vurub
24 oktyabr
Oktyabrın 24-də Rusiya prezidenti Vladimir Putin azərbaycanlı həmkarı İlham Əliyevə zəng edib. Bu barədə Azərbaycan prezidentinin mətbuat xidməti məlumat yayıb.
Məlumata görə, Azərbaycan və Rusiya prezidentləri Düşənbədə MDB Dövlət Başçıları Şurasının iclası çərçivəsində oktyabrın 9-da keçirdikləri görüşün davamı olaraq ikitərəfli gündəliyin bir sıra aktual məsələlərini müzakirə ediblər.
Dövlət başçıları iqtisadi-ticari əlaqələrin daha da inkişaf etdirilməsinə, həmçinin enerji və nəqliyyat-logistika sahələrində birgə layihələrin həyata keçirilməsinə qarşılıqlı maraqlarını təsdiqləyiblər.
"Telefon söhbəti zamanı regional əməkdaşlığın bəzi aspektlərinə və beynəlxalq vəziyyətə toxunulub. Müxtəlif səviyyələrdə təmasların davam etdirilməsi barədə razılıq əldə olunub", - məlumatda bildirilir.
Bu ilin doqquz ayında Azərbaycanla Rusiyanın ticarət dövriyyəsi 4.6 faiz artaraq 3 milyard 659 milyon ABŞ dollarına çatıb.
'Sputnik Azərbaycan'ın icraçı direktoru Rusiyaya göndərilib
20 oktyabr
"Sputnik Azərbaycan"ın icraçı direktoru İqor Kartavıx Bakıda həbsdən azad edilərək Rusiyaya yola düşüb. Bu barədə "İnterfax" Rusiya Xarici İşlər Nazirliyinin (XİN) təmsilçisi Mariya Zaxarovaya istinadla xəbər yayıb.
"Kartavıx azad edilib və Rusiyaya yola düşüb", – Zaxarova oktyabrın 19-da jurnalistlərə deyib.
Kartavıx və "Sputnik-Azərbaycan"ın şef-redaktoru Yevgeni Belousov iyunun sonunda Bakıda həbs ediliblər. Bu, Rusiyada etnik azərbaycanlılara qarşı zorakı reydlərdən sonra baş vermişdi. Oktyabrın 9-da Düşənbədə Rusiya və Azərbaycan prezidentlərinin görüşündən bir gün sonra Kartavıx ev dustaqlığına buraxılıb. Rusiyada isə Moskva Satira Teatrının keçmiş direktoru Məmmədəli Ağayevin həbsdən azad edildiyi bildirilib.
Bu barədə prezidentlərin görüşü ərəfəsində razılaşma əldə olunduğu açıqlanıb.
Ulyanovskdakı Azərbaycan diasporunun rəhbəri Rusiya vətəndaşlığından çıxarılıb
16 oktyabr
Rusiyanın Ulyanovsk vilayətində Azərbaycan diasporunun rəhbəri, Ulyanovsk vilayəti qubernatorunun müşaviri İslam Hüseynov Rusiya vətəndaşlığından məhrum edilib. Rusiya mediası yazır ki, bu qərarı regionun FSB idarəsinin sorğusu əsasında Ulyanovsk Daxili İşlər İdarəsi qəbul edib.
Rəsmi orqanlar qərarın səbəbini açıqlamayıblar. Amma media bunun mövcud geosiyasi durumla bağlı ola biləcəyini yazır.
Azərbaycan və Rusiya prezidentlərinin oktyabrın 9-da Düşənbədə görüşü iki ölkə arasında siyasi gərginliyin bitməsi kimi yozulub. Bu görüşdən sonra "Sputnik Azərbaycan"ın icraçı direktoru Bakıda ev dustaqlığına buraxılıb, Moskvada isə Satira Teatrının keçmiş azərbaycanlı direktoru azadlığa çıxıb.