Uralda Azərbaycan diasporunun rəhbəri həbsdə qaldı
10 oktyabr
Yekaterinburqdakı Azərbaycan diasporunun rəhbəri Şahin Şıxlinskinin apellyasiya şikayəti isə təmin olunmayıb. Sverdlovsk vilayət Məhkəməsində onun barəsində həbs-qətimkan tədbirinin uzadılmasından verdiyi şikayət müsbət cavablanmayıb.
Hakimiyyət nümayəndəsinə zor tətbiq etməkdə ittiham olunan Ş.Şıxlinski bu il dekabrın 30-dək həbsdə qalacaq.
İyulun 1-də Yekaterinburqda, "Baku Plaza" qarşısında hüquq-mühafizə orqanları Ş.Şıxlinskini həbsi üçün xüsusi əməliyyat keçirib. Onlar avtomobilin pəncərələrini sındırmağa başlayanda Şıxlinskinin oğlu Mütvəli idarə etdiyi avtomobili arxaya sürüb və xüsusitəyinatlılardan birini vurub.
Rusiya mediası Ş.Şıxlinskinin qətl planlaşdırmaqda da ittiham olunduğunu yazır.
Rusiyanın öz ərazisində saxladığı Azərbaycan vətəndaşlarından birini azad etdiyi bildirilir. "Kommersant" mənbələrinə istinadla onun Moskva Satira Teatrının keçmiş direktoru, büdcə vəsaiti mənimsəməkdə ittiham olunan Məmmədəli Ağayev olduğunu yazıb. O, avqustun sonunda həbs olunmuşdu.
'Sputnik Azərbaycan'ın icraçı direktoru həbsdən buraxılıb
"Sputnik Azərbaycan"ın Bakıda saxlanmış icraçı direktoru İqor Kartavıx azad edilib. Bu barədə "Kommersant"a Rusiya prezidenti Vladimir Putinin köməkçisi Yuri Uşakov məlumat verib.
"Rossiya Seqodnya" media qrupunun rəhbəri Dmitri Kiselyov İ.Kartavıxın ev dustaqlığına buraxıldığını yazıb.
Qərarın Vladimir Putinlə İlham Əliyevin Düşənbədəki görüşü ərəfəsində qəbul olunduğu bildirilir.
"Rossiya Seqodnya" İnformasiya Agentliyinin Bakı filialının (Sputnik-Azərbaycan) icraçı direktoru İ.Kartavıx və şef redaktoru Yevgeni Belousov bu il iyunun 30-da saxlanılıblar. Onlar barəsində həbs-qətimkan tədbiri seçilmişdi.
Onların dələduzluq, külli miqdarda gəlir əldə etməklə qanunsuz sahibkarlıq və digər maddələrlə ittiham olunduğu açıqlanıb.
9 oktyabr
Əliyev aylar sonra ilk dəfə görüşdü: Putin AZAL təyyarəsi ilə bağlı söz verdi
Oktyabrın 9-da Düşənbədə Rusiya və Azərbaycan prezidentləri arasında görüş keçirilib. Vladimir Putin görüşə AZAL təyyarəsi ilə bağlı məsələnin müzakirəsi ilə başlamağı təklif edib. O, hadisənin Rusiya hava məkanında baş verdiyinə görə üzr istədiyini xatırladıb. Putin deyib ki. Qəzaya səbəb Ukraynanın üç dronunun Rusiya sərhədini pozması olub: "Bizim hava hücumlarına qarşı sistemlərimiz iki raket atıb, amma o raketlər AZAL təyyarəsinə birbaşa dəyməyib, bir neçə metr aralıda partlayıb. Güman ki, təyyarə həmin raketlərin elementləri ilə vurulub".
Putin Əliyevi əmin etməyə çalışıb ki, təzminat ödənməsi də təmin olunacaq...