Hazırda Azərbaycanda olan Rusiya vətəndaşı 2024-cü ildə Avropada yük təyyarələrinə sui-qəsd planını əlaqələndirməkdə şübhəli bilinir. Rusiya və Avropa Yaroslav Mixaylov adlı bu şəxsin saxlanması və ekstradisiyası üçün Bakıya təzyiq göstərir. Bu haqda "The Washington Post" noyabrın 18-də yazıb.
Y.Mixaylov ötən il Avropada hava yük bağlamalarının alovlanmasına səbəb olan hücumların koordinasiyasında şübhəli bilinir. Rəsmilərin dediyinə görə, o, əməliyyatı Avropanın içində idarə edib, sonradan saxta pasportla Azərbaycana qaçıb.
Kreml üçün əhəmiyyəti
Onun Kremlin üçün əhəmiyyətini göstərən amil budur ki, Rusiyanın üç kəşfiyyat qurumu – FSB, SVR və QRU-nun başçıları Mixaylovun Rusiyaya qaytarılması, Polşanın ekstradisiya müraciətinin təmin olunmaması üçün Azərbaycana təzyiq edirlər. Bunu qəzetə Qərbin təhlükəsizlik rəsmiləri deyiblər.
Polşa, Böyük Britaniya, Ukrayna və Litva isə Mixaylovun Rusiyanın qaytarılmasını önləmək məqsədilə Azərbaycan hökumətinə lobbiçilik edirlər, - rəsmilərin dediyidir.
"The Washington Post" məqaləni 20-dən çox Qərb təhlükəsizlik rəsmiləri ilə müsahibələr, əldə etdiyi istintaq materiallarına əsasən hazırladığını bildirir. Bir sənədə əsasən, Polşa Mixaylovun "terror" əməliyyatlarına görə həbsindən ötrü İnterpola gizli müraciət göndərib.
Kremlin sözçüsü Dmitri Peskov qəzetin suallarına cavab verməyib, "Burada şərh edəcəyimiz bir şey yoxdur" deyib.
Qəzet yazır ki, Moskvanın kəşfiyyat xidmətlərinin prosesə müdaxilə cəhdi Rusiyanın Qərbə qarşı "hibrid" müharibəsində inanılmış əlaltılara verdiyi əhəmiyyəti göstərir.
Ötən ilin iyulunda taymerlər və tezalışan maqnezium qarışığı olan bağlamalar Litvada yoxlamadan yayına bilib, Almaniya, Polşa və İngiltərədəki anbarlara çatdırılıb. Orada isə onların səbəb olduğu yanğınlar sürətlə yayılıb.
"Yeni nəsil rus əməliyyatçısı"
"Mixaylov QRU-nun kriminal təşkilatlardan əlaqələri və imkanlarına görə cəlb etdiyi yeni nəsil rus əməliyyatçısını təmsil edir", – Avropanın yüksək vəzifəli təhlükəsizlik rəsmisi belə deyib. QRU Rusiyanın hərbi kəşfiyyat xidmətidir.
37 yaşlı Mixaylov daha öncə Rusiyada qaçaqmalçılıq ittihamları ilə üzləşib. Qəzet onunla əlaqə yarada bilməyib.
Bu planda iştiraka görə Litva və Polşada azı 20 şübhəli terrorçuluq və digər ittihamlarla üzləşib.
Qəzet yazır ki, Azərbaycan indiyədək Mixaylovun ekstradisiya olunması tələblərini rədd edir. Nəticədə onun vəziyyəti qeyri-müəyyən qalır, rəsmən saxlanmasa da, nəzarət altındadır, ölkədən çıxışına icazə yoxdur.
Azərbaycan Xarici İşlər Nazirliyinin sözçüsü də qəzetin şərh üçün müraciətlərinə cavab verməyib.
Bakı Mixaylovu verəcəkmi
"The Washington Post" qeyd edir ki, Tramp administrasiyasının avqustun 8-də Vaşinqtondakı sülh danışıqlarında bu məsələni qaldırıb-qaldırmadığı aydın deyil. Azərbaycan və Ermənistan Vaşinqtonda sülh sazişini paraflayıblar.
Qərb rəsmiləri Mixaylovun ekstradisiyasının perspektivinin aydın olmadığını deyirlər. Amma ona da diqqət çəkirlər ki, Rusiya ilə gərginlik fonunda Azərbaycan Avropa ilə əlaqələri sıxlaşdırır.
Ekspertlər Putinin Bakı ilə münasibətləri düzəltmək cəhdlərini həm də Mixaylovun ekstradisiyasına nail olmaq istəməsi ilə izah edirlər.
Ötən ilin dekabrında Azərbaycan təyyarəsinin Rusiya ərazisində vurulması Moskva ilə Bakı arasında soyuqluq yaradıb. İki ölkə prezidenti bu il oktyabrın 9-da Düşənbədə bir araya gəliblər.
