Bakıda həbsdə olan Qarabağ separatçıları – "Dağlıq Qarabağ Respublikasının prezidenti" olanlar - Araik Arutyunyan, Arkadi Qukasyan, Bako Saakyan və digərlərinin məhkəməsində noyabrın 13-də prokuror onlara cəza istəyib.
Bakı Hərbi Məhkəməsində prokuror A.Arutyunyana, separatçı qurumun "müdafiə naziri" Levon Mnatsakanyana, "müdafiə nazirinin birinci müavini" Davit Manukyana, keçmiş "xarici işlər naziri" Davit Babayana" və "parlament sədri" Davit İşxanyana ömürlük cəza istəyib.
Digər təqsirləndirilənlərdən A.Qukasyan, B.Saakyan, Madat Babayan və Melikset Paşayana isə 20 il cəza istənilib.
Habelə Qarik Martirosyana 19, Davit Allahverdiyana 18 , Levon Balayana 17, Vasili Beqlaryan, Qurqen Stepanyan və Erik Qazaryana da 16 il cəza təklif olunub.
Prokurorlar bildirib ki, A.Qukasyan, B.Saakyan və M.Babayanın yaşı 65-i keçdiyinə görə onlara ömürlük cəza istəmirlər. Azərbaycan qanunvericiliyinə görə, yetkinlik yaşına çatmayan şəxslər, qadınlar və yaşı 65-dən yuxarı olan kişilərə ömürlük azadlıqdan məhrumetmə cəzası təyin oluna bilməz.
Məhkəmə prosesi noyabrın 27-də davam edəcək. Təqsirləndirilən şəxslərin vəkilləri çıxış edəcək, daha sonra özləri son sözlərini deyəcəklər.
Məhkəmə önünə çıxarılan həmin 15 nəfərin bir neçəsi bundan əvvəl özünü qismən təqsirli bildiyini deyib, bəziləri isə, ümumiyyətlə, təqsirli bilmədiyini və ittihamları qəbul etmədiyini açıqlayıb.
31 oktyabr
Arutyunyan və daha 14 nəfərin işi üzrə məhkəmə istintaqı yekunlaşdı
Bakıda həbsdə olan Qarabağ separatçıları – "Dağlıq Qarabağ Respublikasının prezidenti" olmuş Araik Arutyunyan, Arkadi Qukasyan, Bako Saakyan, keçmiş "xarici işlər naziri" Davit Babayan, "parlament sədri" Davit İşxanyan və digərlərindən ibarət 15 nəfərin məhkəməsi yekunlaşır.
Onların işinə baxan Bakı Hərbi Məhkəməsinin hakimlər kollegiyası oktyabrın 31-də məhkəmə istintaqının tamamlanması barədə qərar qəbul edib.
Harutyunyan və onunla mühakimə olunan daha 14 nəfərə 2 min 548 epizod üzrə terrorçuluq, soyqırımı, təcavüzkar müharibə başlama, işgəncə, qəsdən adam öldürmə də daxil, onlarla maddə ilə ittiham verilib. Bu maddələrdə 20 ilədək və ya ömürlük həbs cəzası nəzərdə tutulub.
Məhkəmə önünə çıxarılan 15 nəfərin bir neçəsi özünü qismən təqsirli bildiyini deyib, bəziləri isə, ümumiyyətlə, təqsirli bilməyib.
Qarabağdakı keçmiş separatçı rejimin "dövlət naziri" olmuş milyarder Ruben Vardanyan isə tək mühakimə olunur. Onun da işinə Bakı Hərbi Məhkəməsinin sədri və iki hakimindən ibarət eyni kollegiya baxır.
Vardanyan məhkəmədə ifadə verməkdən imtina edib.
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Azərbaycanın Qarabağ bölgəsi və ətrafındakı 7 rayon işğal edilmişdi.
2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib.
Bu il avqustun 8-də Azərbaycan və Ermənistanın xarici işlər nazirləri Vaşinqtonda sülh sazişini paraflayıblar.
