Noyabrın 21-i saat 19:50 radələrində Bakının Yasamal rayonu, M.Seyidov küçəsində yaşayış binasında yanğın olub.

Respublika Təcili və Təxirəsalınmaz Tibbi Yardım Mərkəzinin məlumatına görə, çağırış ünvanına 18 təcili tibbi yardım briqadası cəlb olunub: "20 nəfər Kliniki Tibbi Mərkəzə hospitalizasiya olunub... Üç nəfərin isə həkiməqədər ölüm faktı qeydə alınıb".

+++

Yasamal rayonu, Mirəli Seyidov küçəsi 19A ünvanında çoxmərtəbəli yaşayış binasında yanğın tikilinin elektrik şaxtasında baş verib.

Yerli saytların məlumatına görə, bu barədə Fövqəladə Hallar Nazirliyinin (FHN) Dövlət Yanğından Mühafizə Xidmətinin əməliyyat növbətçisi Nurlan İsayev jurnalistlərə açıqlamasında bildirib.

Mənzillərin yanğından mühafizə olunduğu, sakinlərin isə təhlükəsiz əraziyə tam təxliyə edildiyi deyilir.

Cinayət işi açılıb

Baş Prokurorluğun Mətbuat xidmətinin məlumatına görə, hadisə nəticəsində əmələ gələn tüstüdən üç nəfər boğularaq ölüb, azı 20 nəfər isə zəhərlənib.

"Faktla bağlı Baş Prokurorluqda Cinayət Məcəlləsinin müvafiq maddəsi ilə cinayət işi başlanaraq ibtidai istintaq aparılır", - məlumatda bildirilir.

Azərbaycanda son həftələr hisə verilmiş balıqların qiymətində ciddi artım müşahidə edildiyi bildirilir.

Paytaxt Bakı sakinlərinin sözlərinə görə, bahalaşma hisə verilmiş bütün növ balıqlarda özünü göstərir. Mütəxəssislər deyirlər ki, sözügedən məhsulun qiyməti təkcə son bir ayda ümumilikdə 30 faiz artıb.

Bildirilir ki, bahalaşmaya səbəb idxal xərclərinin yüksəlməsidir. Amma rəsmi qurumlar, hələlik, bu məsələyə münasibət bildirməyiblər.

Paytaxt sakinlərinin sözlərinə görə, yaş balıqda da bahalaşma müşahidə edilir. Ancaq onlar vurğulayırlar ki, yaş balıqlarda qiymət artımı azdır. Onlar bunu ölkədə mal-qara arasında dabaq xəstəliyinin yayılmasından sonra balıq və quş ətinə tələbatın artması ilə izah edirlər. Quş ətinin də təqribən 80 qəpik-1 manat bahalaşdığı vurğulanır.

Dövlət Statistika Komitəsinin məlumatına görə, son bir ildə Azərbaycanda ərzaq 8.2 faiz bahalaşıb. Müstəqil iqtisadçılar bu rəqəmə bir qədər şübhə ilə yanaşır, bahalaşmanın daha yüksək olduğunu deyirlər.

Artıq üçüncü gündür Rusiyanın Ternopolda çoxmərtəbəli yaşayış binasına zərbəsindən sonra axtarış-xilasetmə işləri gedir. Hücum nəticəsində həlak olanların sayı 31-ə çatıb.

Xilasedicilər dağıntılar altından daha üç nəfərin – bir qadının və iki uşağın meyitini çıxarıblar.

Bu haqda Ukrayna Milli Polisi məlumat yayıb.

Həlak olanların altısı uşaqdır, 90-dan çox xəsarət alan var, onların arasında 18 uşaq var.

Polisin həlak olanların şəxsiyyətinin müəyyənləşdirildiyini, hələ də itkin düşənlərin axtarışının getdiyini bildirir.

Noyabrın 19-na keçən gecə Rusiya ordusu Ukraynanın qərb bölgələrinə zərbələr endirib. Ternopolda doqquzmərtəbəli yaşayış binası qismən dağılıb, digər doqquzmərtəbəli binada yanğın olub. Ukrayna binaya Rusiyanın X-101 raketinin düşdüyünü bildirir.

19 noyabr

Ukrayna Rusiyaya ATACMS raketləri ilə hücum etdi

Ukrayna noyabrın 18-də Voronejə ABŞ istehsalı olan dörd uzaqmənzilli ATACMS raketi ilə zərbə endirib. Bunu Rusiyanın Müdafiə Nazirliyi (MN) bildirir.

Ukrayna Silahlı Qüvvələrinin Baş Qərargahı bir gün öncə bildirmişdi ki, Rusiyanın ərazisində bir hərbi obyektə zərbə endirmək üçün ATACMS-dən istifadə olunub. Bu, müharibə başlayandan bəri ilk belə haldır. Qurum neçə raketin buraxıldığını, hansı istiqamətdə atıldığını dəqiqləşdirməyib.

Rusiya Müdafiə Nazirliyinin məlumatına görə, bütün raketlər vurulub, yerə düşən qalıqlar uşaq evinin, herontologiya mərkəzinin və şəxsi evin damlarına ziyan vurub. Rusiya MN vurulduğu bildirilən raketlərin qalıqlarının fotolarını dərc edib.

Qurum Xarkov vilayətində ATACMS raketlərinin buraxılış qurğularının cavab zərbəsi ilə məhv edildiyini bildirib. Amma bu məlumat müstəqil təsdiqlənməyib

İndiyədək Ukrayna bu raketlərlə Rusiyanın işğal etdiyi ərazilərə zərbələr endirib.

ABŞ 2023-cü ildən Ukraynaya ATACMS uzaqmənzilli ballistik raketlər verir. O zaman Vaşinqton Ukraynanın Rusiya ərazisini vurmasına qadağa qoymuşdu, bu qadağa sonradan aradan qaldırıldı. 2025-ci ilin sentyabrında ABŞ prezidentinin xüsusi elçisi Kit Kelloq Ukraynanın Rusiyanın dərinliyinə zərbələr endirə biləcəyini təsdiqləmişdi.

Qazaxıstanın Kokşetau şəhərindən bloqer, "şimallı qazax" ləqəbli Aslan Toleqenov milli ədavəti qızışdırmaq və saxta məlumatlar yaymaq maddələri üzrə 3 il 9 ay həbsə məhkum edilib.

O, sosial şəbəkələrdə və YouTube kanalında Qazaxıstanın Rusiya ilə əlaqələrini möhkəmləndirməyə çağırır, Qərb mövzularını dəstəkləməməyi təbliğ edirdi. Deyirdi ki, Qazaxıstan strateji baxımdan Rusiyaya yönəlsə, ölkədə təhlükəsizlik, sabitlik və ardıcıl inkişaf olar. O, iki ölkə arasında ortaq mədəni dəyərlərdən, iqtisadi əməkdaşlığın qarşılıqlı faydasından danışırdı.

Videolarından birində Toleqenov deyib ki, onun ana dili rus dilidir və Rusiyaya Orta Asiyada iqtisadiyyatın, elm və mədəniyyətin inkişafına görə təşəkkür edib. Rusiya təbliğat mediası bloqeri "Qazaxıstanda rusofobiya" mövzusunda müsahibələrə dəvət edib.

"Fikrimcə, bloqerlərdən kütləvi informasiya vasitələrinə qədər bu istiqamətdə texniki provokasiyalarla Rusiyaya və ruslara qarşı nifrəti artırmağa çalışırlar", –Toleqenov bildirib.

Toleqenovun qapalı keçən məhkəmədə günahını etiraf etdiyi bildirilir.

AzadlıqRadiosunun qazax xidməti hökmün sosial şəbəkələrdə fəal müzakirə olunduğunu yazır. Deputat Ermurat Bapi cəzanı yüngül sayır. Bloqerin tərəfdarları isə Qazaxıstan hakimiyyətini onu azad etməyə çağırırlar. Onlar "şimallı qazaxa azadlıq" həştəqi ilə Toleqenova dəstək videoları paylaşırlar.

Qazaxıstan Cinayət Məcəlləsinin 174-cü maddəsi milli ədavəti qızışdırmağa görə cəza nəzərdə tutur və ölkənin iki ən böyük etnik qrupu olan qazaxlara, həm də ruslara qarşı təhqiredici ifadələrə qarşı tətbiq olunur.

Noyabrın 3-də Karaqanda məhkəməsi 22 yaşlı Alika Muxamadiyevanı qazaxlar və müsəlmanlar haqqında təhqiredici şərhlərə görə 3 il yarım müddətinə həbsə məhkum edib. Azyaşlı övladı olduğuna görə cəza təxirə salınıb.

Bu ilin iyununda isə Şimali Qazaxıstan vilayətində hamilə Jansla Darxambayeva 2 il həbs cəzasına məhkum edilib. Onun TikTok-da Rusiya prezidenti Vladimir Putini Qazaxıstan torpaqlarını qaytarmağa çağırdığı və rusları təhqir etdiyi bildirilir.

Mobil telefonlar aksiz dərəcəsinə cəlb olunacaq. Fiziki şəxslərin şəxsi istifadəsi üçün ölkəyə gətirilən 1 ədəddən artıq mobil cihazın qeydiyyatına 100 manat dövlət rüsumu alınacaq.

Bu, Milli Məclisin bu gün, noyabrın 21-də keçirilən iclasında müzakirəyə çıxarılan Vergi Məcəlləsi və "Dövlət rüsumu haqqında" Qanuna təklif edilən dəyişiklikdə əksini tapıb.

Vergi Məcəlləsinə təklif edilən dəyişikliyə görə, ölkəyə idxal olunan mobil cihazların hər ədədi üçün 20 manat aksiz vergisi tutulacaq. Fiziki şəxsin öz istifadəsi üçün il ərzində ölkəyə gətirdiyi 1 ədəd mobil cihaz aksizdən azad olunacaq.

"Dövlət rüsumu haqqında" Qanuna təklif edilən dəyişikliyə əsasən isə, fiziki şəxslərin il ərzində ölkəyə gətirdikləri 1 ədəddən artıq mobil cihazın qeydiyyatı üçün 100 manat dövlət rüsumu alınacaq.

Müzakirələrdən sonra qanun layihəsi səsverməyə çıxarılaraq birinci oxunuşda qəbul edilib.

Ekspertlər hesab edirlər ki, bu xaricdən gətirilən telefonları bahalaşdıracaq. Onlar xatırladıblar ki, 2026-cı ilin büdcə layihəsində vergi daxilolmalarının artırılması nəzərdə tutulur.

Rusiya Silahlı Qüvvələrinin baş qərargah rəisi Valeri Gerasimov Xarkov vilayətindəki Kupyansk şəhərinin "azad olunduğunu" bildirib, Ukrayna Silahlı Qüvvələrinin Baş Qərargahı isə bu iddianı təkzib edib.

Gerasimov noyabrın 20-də "Qərb" qoşun qruplaşmasının komanda məntəqələrindən birində prezident Vladimir Putinə məruzə edib. Baş qərargah rəisi bildirib ki, Rusiya hərbçiləri Kupyanskı və Xarkov vilayətinin Volçansk şəhərinin 80 faizindən çoxunu "azad ediblər". Bundan əlavə, Gerasimov Pokrovsk ərazisinin 70-75 faizindən çoxunun Rusiyanın nəzarətində olduğunu iddia edib.

Ukrayna Baş Qərargahı isə Kupyanskın hələ də Ukrayna Müdafiə Qüvvələrinin nəzarəti altında olduğunu bildirib. Ukrayna ordusuna görə, "şəhər və onun ətraflarında düşmənin şəhərə sızmış diversiya-kəşfiyyat qruplarının aşkarlanması və zərərsizləşdirilməsi üçün əks-diversiya tədbirləri və xüsusi əməliyyatlar davam edir".

"Yampolda da oxşar vəziyyət müşahidə olunur. Yaşayış məntəqəsi yaxınlığında qoşunlarımızın axtarış-zərbə əməliyyatları davam edir. Xarkov vilayətində Volçanskın guya 80 faizinin və Pokrovskun 70 faizinin ələ keçirilməsi barədə bəyanatlar da həqiqətə uyğun deyil", – Ukrayna Baş Qərargahı bildirir.

Türkiyənin futbol liqalarında daxili mərc oyunları ilə bağlı istintaqın daha da genişlənəcəyi gözlənir. Noyabrın 20-də prokuror məşqçilərin, şərhçilərin, klub başçılarının da istintaqa cəlb olunacağını bildirib.

Peşəkar liqalarda bəzi rəsmilərin oyunlara mərc qoyduğu açıqlanandan sonra Türkiyə Futbol Federasiyası (TFF) noyabrın əvvəlində 149 hakim və hakim köməkçisini vəzifədən çıxarıb.

Ötən həftə əməliyyat genişlənib, yüksək liqa klublarından birinin rəhbəri daxil səkkiz nəfər həbs olunub. Federasiya bütün liqalardan mindən çox oyunçunu uzaqlaşdırıb. İkinci və üçüncü liqalarda oyunlar iki həftəlik dayandırılıb.

"Növbəti günlərdə yeni bir əməliyyat keçirə bilərik. Futbolumuzu tam təmizləmək istəyirik", – İstanbulun baş prokuroru Akın Gürlek NTV-yə deyib. O, Türkiyənin UEFA, İnterpol ilə əməkdaşlıq etdiyini söyləyib. Hakimiyyət orqanları Monteneqro, Kipr və Gürcüstanda qeyri-qanuni qumar oynamaqda şübhəli bilinən türkiyəliləri də izləyir. Prokuror hazırda türkiyəli şübhəlilərin qeyri-qanuni mərc üçün yararlandığı xarici mərc platformalarından cavab gözlədiklərini əlavə edib.

TFF məsələni şərh etməsə də, federasiya prezidenti İbrahim Hacıosmanoğlu etiraf edib ki, "türk futbolunda mənəvi böhran" yaşanır.

Federasiyanın araşdırması üzə çıxarıb ki, Türkiyənin peşəkar liqalarındakı 571 hakimdən 371-nin mərc hesabı var.

Türkiyənin idman intizamı qaydalarına görə, oyunun nəticəsinə, gedişatına təsir göstərməkdə və ya bunun üçün ödəniş almaqda təqsirli bilinən şəxslər idmandan ömürlük uzaqlaşdırılır. Bu pozuntuları klub rəhbərləri törədirsə, klub təmsil edildiyi liqadan kənarlaşdırılır, məsuliyyət daşıyanlar cərimələnir.

Ermənistanın vətəndaş cəmiyyəti nümayəndələrindən ibarət qrupun bu gün, noyabrın 21-də Azərbaycan paytaxtı Bakıya səfər etdiyi bildirilir.

Ölkənin yerli saytlarının məlumatına görə, bu səfər oktyabrın 21-i və 22-də Azərbaycan nümayəndə heyətinin Ermənistan paytaxtına səfərinə cavab olaraq həyata keçirilir.

Oktyabrın 22-də Yerevanda Ermənistan və Azərbaycan qeyri-hökumət təşkilatları (QHT) nümayəndələrinin iştirakı ilə ikitərəfli dəyirmə masa keçirilmişdi. Tədbir Təhlükəsizlik Şurasının katibi Armen Qriqoryanın iştirakı ilə baş tutub. Görüş təşəbbüsü sülh gündəliyini bu il avqustun 8-də Vaşinqtonda qəbul olunmuş Birgə Bəyannamə ruhunda təbliğ etmək məqsədi daşıyıb.

Bu il avqustun 8-də 30 ildən çox münaqişədə olmuş Azərbaycan və Ermənistanın rəsmiləri Vaşinqtonda sülh müqaviləsinin mətnini paraflayıblar. Oval ofisdə ABŞ prezidentinin iştirakı ilə tərəflər görüşün nəticələri haqda bəyannamə də imzalayıblar. Bəyannaməyə əsasən, Ermənistanın cənubundan keçməklə Azərbaycanın əsas hissəsi ilə Naxçıvan arasında maneəsiz əlaqə yaranacaq. TRIPP adlanan bu marşrut Ermənistanın suverenliyini, ərazi bütövlüyünü və yurisdiksiyasını qoruyub saxlayacaq.

Paraflanan mətində tərəflər bir-birlərinin ərazi bütövlüyünü tanıyır, habelə qarşılıqlı iddiaların geri çəkiləcəyi vurğulanır. Sənəddə habelə mübahisəli məsələlərin müzakirələrlə həlli vacib sayılır.

Noyabrın 20-də səhər Rusiya dronu Donetsk vilayətinin Liman şəhərinə dinc sakinləri çıxarmağa gedən evakuasiya maşınına zərbə endirib.

Avtomobildə AzadlıqRadiosunun layihələrindən biri "Donbass Reallii" müxbiri Sergey Qorbatenko, iki polis əməkdaşı və "Plain Compassion Crisis Response" humanitar təşkilatının amerikalı könüllüsü olub.

Hücum nəticəsində sükan arxasında olan amerikalı könüllü üzündən qəlpə yaraları alıb.

"Gedirdik və qəfildən səs eşitdik. Nə baş verdiyini tam anlamadım. Mən ABŞ-dəyəm, buraya insanları çıxarmağa gəlmişik. İndi bir az çaşqınam", – könüllü Devon Masser ilkin tibbi yardımdan sonra deyib.

Avtomobil tamamilə yanıb.

Azad Avropa/Azadlıq Radiolarının (RFE/RL) macar xidməti 21 noyabr gecəyarıdan bağlanır. Bu xidmət beş il öncə macarıstanlılara dəqiq və müstəqil xəbərlər çatdırmaq üçün bərpa olunmuşdu.

Xidmət izləyicilərinə müraciətində bildirir ki, komandası "Macarıstandakı auditoriyanı müstəqil jurnalistika ilə təmin etməkdən ötrü fədakarlıqla çalışıb".

Xidmətin hazırladığı kontent onlayn əlçatan qalacaq.

"Oxucularımızın bizə göstərdiyi etimada, diqqətə və dəstəyə görə dərin minnətdarlıq hissi duyuruq", – bəyanatda deyilir.

AzadlıqRadiosunun prezidenti və baş icraçı direktoru Stiv Kapus macar xidməti jurnalistlərinin işini yüksək qiymətləndirib: "Onların peşəkarlığı, fədakarlığı və missiyamıza sarsılmaz töhfəsi uğurumuza mənalı təsir göstərib, onların bu quruma gətirdiyi hər bir şeyə görə dərin minnətdarıq".

Macar xidməti 2020-ci ildə ABŞ Konqresinin tapşırığı ilə bərpa olunub. Daha öncə əvvəl xidmət 1950–1993-cü illərdə fəaliyyət göstərib.

AzadlıqRadiosu daxil ABŞ-nin maliyyələşdirdiyi yayımçılara nəzarət edən ABŞ Qlobal Media Agentliyi (USAGM) noyabrın 5-də Konqresə radionun macar xidmətini bağlamaq niyyətini bildirib. Xidmət 2025-ci il noyabrın 21-dən bağlanır.

"Yeni fəaliyyətimizin ilk günündən auditoriyanın diqqətinə və dəstəyinə görə minnətdarıq. Onlara unikal və orijinal hekayələr təqdim etmək bizdən ötrü şərəf olub", – macar xidmətinin rəhbəri Tibor Voveş belə deyib.

Noyabrın 20-də Səbail rayon Məhkəməsində "Hürriyyət TV"nin həbsdə olan baş redaktoru Vüqar Məmmədovun (Tofiqoğlu) səhhətinə görə, ev dustaqlığına buraxılması ilə bağlı vəsatətinə baxılıb. Hakim Ülviyyə Şükürova vəsatəti təmin etməyib.

Müdafiə tərəfinin fikrincə, məhkəmə zamanı V.Məmmədovun ürək ağrılarının güclənməsi, təzyiqinin düşməsi səbəbindən davamlı qaytarması bir daha sübut edir ki, onun sağlıq durumunda ciddi problem var.

31 oktyabr

'Hürriyyət'in baş redaktoru Vüqar Məmmədov həbs edilib

Oktyabrın 31-də "Hürriyyət" qəzeti və "Hürriyyət TV"nin baş redaktoru Vüqar Məmmədov (Tofiqoğlu) hakim önünə çıxarılıb. Bu barədə "Hürriyyət" qəzeti məlumat yayıb.

Səbail rayon Məhkəməsinin qərarı ilə V.Məmmədov 3 ay 13 gün müddətinə azadlıqdan məhrum edilib.

Vurğulandığına görə, o, hədə-qorxu ilə pul tələb etməkdə ittiham olunur.

"Hürriyyət" Səbail rayon Məhkəməsinin bu qərarını sifarişli və tamamilə əsassız hesab edir.

30 oktyabr

'Hürriyyət TV'nin baş redaktoru Vüqar Məmmədov saxlanılıb

"Hürriyyət TV" internet televiziyasının, eyniadlı qəzetin baş redaktoru Vüqar Məmmədov (Tofiqoğlu) saxlanılıb.

AzadlıqRadiosunun məlumatına görə, oktyabrın 29-da Dövlət Təhlükəsizliyi Xidmətinin (DTX) əməkdaşları bu media orqanlarının yerləşdiyi redaksiyada əməliyyat keçirib. Redaksiyada axtarış aparılıb, kompüterlər, sənədlər götürülüb.

"Vüqar Məmmədovla yanaşı, başqa əməkdaşlar da saxlanılaraq DTX-ya aparılıb. Lakin onlar sonradan buraxılıb", – AzadlıqRadiosunun əldə etdiyi məlumatda bildirilir.

V.Məmmədovun saxlandığını onun yaxınları da AzadlıqRadiosuna təsdiqləyib. Əlavə ediblər ki, redaksiyadan sonra evdə də axtarış aparılıb.

"Hürriyyət"in redaksiyasında əməliyyat keçirilməsi, baş redaktorunun saxlanması barədə məlumatlara DTX-dan şərh almaq mümkün olmayıb.

V.Məmmədov 2023-cü ilin iyununda "Hürriyyət TV"nin efirində qadağan edilmiş məlumatın yayılmasında günahlandırılaraq 1 ay həbs olunmuşdu.

V.Məmmədov Azərbaycan Demokrat Partiyasının (ADP) sədri Sərdar Cəlaloğlunun, hazırda xaricdə yaşayan hüquqşünas Qurban Məmmədovun bacısı oğludur.

Q.Məmmədov barəsində Baş Prokurorluqda araşdırma gedir. O, bəzi digər mühacirlər kimi, dövlət əleyhinə və kütləvi iğtişaşlara çağırışlarda suçlanır.

Xaricdə yaşayan bəzi bloqerlər barədə bu və digər ittihamlarla qiyabi həbs qərarı çıxarılıb. Onlar ittihamları qəbul etmir, tənqidi çıxışlarına görə təqib olunduqlarını deyirlər.

Son günlər Azərbaycanda yumurta bahalaşıb. İstər paytaxt Bakı, istərsə də ölkənin bölgələrində yaşayan sakinlərin AzadlıqRadiosuna bildirməsinə görə, bahalaşma həm kənd, həm də broyler yumurtasında özünü göstərir.

Ayrı-ayrı rayon sakinlərinin sözlərinə görə, bazarlarda kənd yumurtasının bir ədədi 45-50 qəpiyə qədər yüksəlib. Bir qədər əvvəl kənd yumurtası 40 qəpikdən belə ucuz olub.

Paytaxt sakinlərinin deməsinə görə, marketlərdə broyler yumurtalarının qiymətində də bahalaşma var. Hazırda broyler yumurtasının bir ədədi 17-20 qəpiyə təklif edilir. Bir neçə gün əvvəl isə broyler yumurtası 14-15 qəpiyə satılıb.

"Qəhvəyi yumurtalar var. Əvvəl bir ədədi 17 qəpiyə təklif edilirdi. İndi marketdə 35 qəpiyə yüksəlib", - adının çəkilməsini istəməyən bir paytaxt sakini vurğulayıb.

Rəsmilər hələlik bu məsələyə münasibət bildirməyiblər.

Ekspertlər isə bunu bir neçə səbəblə izah edirlər. Onların deməsinə görə, quş yemi və dava-dərmanında bahalaşma var. Üstəlik, onlar əlavə ediblər ki, rayonlarda ev təsərrüfatlarının sayında da azalma var.

Azərbaycan Dövlət Statistika Komitəsinin məlumatına görə, bu ilin 10 ayında 1 milyard 975.2 milyon ədəd yumurta istehsal edilib. 2024-cü ilin müvafiq dövrünə nisbətən yumurta istehsalı 3 faiz artıb.

Amma bu il yumurta ixracında da artım olduğu bildirilib.

Gürcüstan vətəndaşı Mixeil Çxikvişvili Bruklin Federal Məhkəməsində nifrət cinayətlərinə çağırış, bomba və ritsin zəhərinin hazırlanması təlimatlarını yaymaqda özünü təqsirli bilib. O, ağ irqin üstünlüyünü təbliğ edən, zorakı ekstremist "Maniac Murder Cult" (Manyak Qətl Kultu) təşkilatının liderlərindən biridir. Məlumatı ABŞ Ədliyyə Nazirliyi yayıb.

Məlumata görə, Çxikvişvili "Mişka", "Mixeil", "Qəssab komandir" və "Qəssab" ləqəbləri ilə tanınıb. O, yəhudi icmasına və irqi azlıqlara qarşı partlayışlar, zəhərlənmə hücumlarının təşkili üçün başqalarını cəlb edib. Çxikvişvili Nyu-Yorkda çoxsaylı qurbanlara səbəb olacaq terror aktının planlaşdırılmasında, buna təhrikdə də ittiham olunur.

Çxikvişvili 2024-cü ilin iyulunda Moldovada saxlanılıb, bu ilin mayında ABŞ-a ekstradisiya edilib.

Federal Təhqiqatlar Bürosunun (FTB) rəhbəri Keş Patel deyib ki, o, "yəhudilərə və irqi azlıqlara qarşı dəhşətli qəsd planında iştirakını qəbul edib, hətta bayramlarda uşaqları zəhərli konfetlərlə öldürməyi planlaşdırıb".

ABŞ Ədliyyə Nazirliyi Çxikvişvilinin 2022-ci ilin iyunundan Bruklində yaşadığını bildirir. Onun Nyu-Yorkda kütləvi zorakılığa təhrik etdiyi şəxslərdən biri FTB-nin gizli agenti olub.

İttiham aktına görə, Çxikvişvili 2023-cü ilin noyabrında Yeni il ərəfəsində Nyu-Yorkda kütləvi qırğın törətmək üçün terror aktını planlaşdırmağa başlayıb. Plana əsasən, icraçılardan biri Santa Klausa bənzər geyimdə irqi azlıqlara zəhərli konfetlər paylamalı idi.

Ədliyyə Nazirliyi Çxikvişvilinin dünya üzrə bir neçə hücum və qətlə səbəb olduğunu bildirir. Bu ilin yanvarında Tennessi ştatının Neşvil şəhərində 17 yaşlı məktəbli bir nəfəri öldürüb, birini yaralayıb və sonra intihar edib; hücum onlayn yayımlanıb, cinayətkarın manifestində Çxikvişvili və "Maniac Murder Cult"a istinad olunub. 2024-cü ilin avqustunda isə Türkiyənin Əskişəhir şəhərində bir şəxs məscidin yaxınlığında beş nəfərə bıçaqla xəsarət yetirib; o, nasist simvollu taktiki jilet geyinib, Çxikvişvilinin "Nifrətçinin təlimatı"nı və digər zorakılığı təşviq edən materiallar yayıb.

ABŞ Ədliyyə Nazirliyi Çxikvişvilini maksimum 40 il həbs cəzası gözlədiyini bildirib.

Bu ilin 10 ayında Azərbaycanda avtomobil istehsalı azalıb, idxal isə artıb.

Bu barədə Azərbaycan dövlət statistika və gömrük komitələrinin hesabatlarında bildirilir.

2025-сi ilin yanvar-oktyabr aylarında ölkədə 3 min 280 ədəd və ya əvvəlki ilin müvafiq dövrü ilə müqayisədə 1 min 153 ədəd az (-26 faiz) minik avtomobili istehsal olunub. Yanvar-oktyabr aylarında əvvəlki ilin müvafiq dövrü ilə müqayisədə traktorların istehsalı 13.7 faiz, yük avtomobillərinin istehsalı isə 31.6 faiz azalıb.

Hökumət rəsmiləri hələlik bunu şərh etməyiblər. Ekspertlər isə bunu yerli istehsalın lazımı bazar əldə etməməsi ilə izah ediblər. Üstəlik, onların deməsinə görə, Azərbaycanda avtomobillər istehsal olunmur, bir qayda olaraq, yığılır, çünki lazımı avadanlıqların əksəriyyəti ölkəyə xaricdən gətirilir.

Əvəzində ölkəyə avtomobil idxalında artım var. 10 ay ərzində 1 milyard 606 milyon 638 min dollar dəyərində 86 min 909 ədəd minik avtomobili gətirilib. Bu il Azərbaycana avtomobil idxalı dəyər ifadəsi ilə 308 milyon 671 min dollar (+20.8 faiz), miqdar ifadəsi ilə isə 19 min 860 ədəd (+26.8 faiz) artıb.

Azərbaycan tarixində adı "Qarakənd faciəsi" kimi xatırlanan olaydan 34 il keçir.

1991-ci il noyabrın 20-də Azərbaycanın Xocavənd rayonunun Qarakənd kəndi yaxınlığında rəsmi şəxslərinin olduğu helikopter qəzaya uğrayıb. Azərbaycanın rəsmi versiyasına görə, helikopterə ərazidə olan Ermənistan silahlı qüvvələri atəş açıb.

Nəticədə içəridəki 22 nəfərin hamısı həlak olub. Onların arasında Azərbaycanın daxili işlər naziri Məhəmməd Əsədov, baş prokuror İsmət Qayıbov, dövlət katibi Tofiq İsmayılov, onun köməkçisi Rafiq Məmmədov, SSRİ Ali Sovetinin deputatları Vəli Məmmədov, Zülfü Hacıyev, Prezident Aparatının şöbə müdiri Osman Mirzəyev, Şuşa şəhər İcra Hakimiyyətinin başçısı Vaqif Cəfərov, jurnalist Alı Mustafayev, operator Fəxrəddin Şahbazov, işıqçı Arif Hüseynzadə, bundan başqa Rusiya və Qazaxıstan hərbi müşahidəçiləri də olub.

İlkin rəsmi məlumatlarda helikopterin dumana düşərək qayaya çırpılması ehtimalı irəli sürülsə də, sonradan onun vurulduğu açıqlanıb. Amma Ermənistanın rəsmi qurumları və Qarabağda ovaxtkı separatçı qurumun təmsilçiləri Azərbaycanın versiyasını təsdiqləməyiblər.

Faktla bağlı hadisənin ertəsi günü Hərbi Qarnizon Prokurorluğu cinayət işi açıb və istintaqın davam etdirilməsi üçün Respublika Prokurorluğuna verilib. Sonradan cinayət işi üzrə istintaq dayandırılıb. Səbəb hadisənin baş verdiyi ərazinin Ermənistan Silahlı Qüvvələri tərəfindən işğal olunduğu qeyd edilib. Cinayəti törədən şəxsləri müəyyənləşdirmək mümkün olmayıb.

Həmin hadisə ilə bağlı bugünədək müxtəlif versiyalar səsləndirilir.

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Tədricən Azərbaycanın Qarabağ bölgəsi və ətrafındakı 7 rayon işğal edilmişdi.

2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində isə Bakı bütün ərazilərində suverenliyini bərpa edib.

Bundan sonra bölgədəki erməni əhali Ermənistana köç edib. Ermənistan baş verənləri "etnik təmizlənmə", Azərbaycan "antiterror tədbirləri" adlandırıb.

Son illər iki ölkə arasında müxtəlif formatlarda sülh danışıqları aparılıb. Nəhayət, bu il avqustun 8-də Azərbaycan və Ermənistanın xarici işlər nazirləri Vaşinqtonda sülh sazişini paraflayıblar. Sənəddə tərəflər bir-birinin ərazi bütövlüyünü, suverenliyini tanıyır, həmçinin qarşılıqlı iddiaların geri götürülməsini zəruri sayırdılar.