Bu gün, noyabrın 19-da Azərbaycan xarici işlər naziri Ceyhun Bayramov ABŞ dövlət katibinin siyasi məsələlər üzrə müavini Ellison Hukeri qəbul edib.
Bu barədə Azərbaycan Xarici İşlər Nazirliyi (XİN) məlumat yayıb.
Məlumata görə, görüşdə Azərbaycan-ABŞ ikitərəfli əməkdaşlığının cari vəziyyəti, inkişaf perspektivləri, Azərbaycan-Ermənistan sülh prosesi, eləcə də regional və qlobal təhlükəsizlik məsələləri ətrafında geniş fikir mübadiləsi aparılıb.
"Avqustun 8-də tarixi Vaşinqton görüşü zamanı əldə edilmiş razılıqlar məmnunluqla xatırlanaraq iki ölkə arasında strateji tərəfdaşlığın inkişafı istiqamətində birgə səylərin vacibliyi qeyd olunub", - məlumatda vurğulanıb
"Azərbaycanın əsas hissəsi və onun Naxçıvan Muxtar Respublikası arasında maneəsiz bağlantının təmin edilməsi məqsədilə ABŞ tərəfindən həyata keçiriləcək "Beynəlxalq Sülh və Rifah naminə Tramp Marşrutu" üzrə işlərin sürətləndirilməsində maraqlı olduğumuz diqqətə çatdırılıb", - XİN əlavə edib.
Habelə bildirildiyinə görə, Strateji Tərəfdaşlıq Xartiyasının hazırlanması məqsədilə iki ölkə arasında Strateji İşçi Qrupun fəaliyyət istiqamətləri nəzərdən keçirilib, ikitərəfli praktiki əməkdaşlıq üçün institusional çərçivənin təsis edilməsinin vacibliyi diqqətə çatdırılıb.
ABŞ dövlət katibinin müavini Azərbaycana Ermənistan paytaxtı Yerevandan gəlib.
+++
Prezidentin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev noyabrın 19-da ABŞ dövlət katibinin siyasi məsələlər üzrə müavini Ellison Hukerlə görüşüb.
Xatırlatma
Bu il avqustun 8-də Vaşinqtonda dövlət başçıları İlham Əliyev və Donald Tramp Strateji Tərəfdaşlıq Xartiyasının hazırlanması məqsədilə Strateji İşçi Qrupun yaradılması haqqında Anlaşma Memorandumunu imzalayıblar.
2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib. Son illər Azərbaycan və Ermənistan arasında müxtəlif formatlarda sülh danışıqları gedib. Bu il avqustun 8-də tərəflər, nəhayət, ABŞ-nin vasitəçiliyi ilə sülh sazişini paraflayıblar.
18 noyabr
ABŞ TRIPP-ə görə Gürcüstanla da danışır
ABŞ TRIPP-ə görə Gürcüstanla da danışır
ABŞ Dövlət Departamentinin böyük müşaviri Conatan Askonas Gürcüstanda rəsmi səfərdədir. Bu barədə ABŞ səfirliyi məlumat yayıb.
Məlumatda deyilir ki, səfər zamanı Beynəlxalq Sülh və Rifah üçün Tramp Marşrutuna (TRIPP) Gürcüstanın necə dəstək verə biləcəyi müzakirə olunacaq.
Noyabrın 18-də C.Askonas Gürcüstan-Ermənistan sərhədində ABŞ-nin dəstəyi ilə tikilmiş Sadaxlı sərhəd-keçid məntəqəsini ziyarət edib. ABŞ diplomatı Gürcüstanın Xarici İşlər Nazirliyinin (XİN), hökumətin, beynəlxalq maliyyə təşkilatlarının təmsilçiləri ilə görüşəcək.
Baş nazir Nikol Paşinyan ABŞ dövlət katibinin müavini Ellison Hukeri qəbul edib.
17 noyabr
ABŞ dövlət katibinin müavini Yerevanda səfərdədir
ABŞ və Ermənistan arasında davam edən əməkdaşlıq, Ermənistanla Azərbaycanın tam sülh sazişinə doğru irəliləyişi, Ermənistanın Türkiyə ilə münasibətlərinin normallaşması Cənubi Qafqazı həyati əhəmiyyətli ticarət marşrutuna çevirə bilər. Bunu ABŞ dövlət katibinin müavini Ellison Huker Ermənistanın baş naziri Nikol Paşinyan ilə görüşündə deyib.
N.Paşinyan ABŞ və Ermənistan arasında əməkdaşlığın yeni səviyyəyə yüksəldiyini bildirib, ABŞ-nin, şəxsən prezident Donald Trampın Ermənistanla Azərbaycan arasında sülhün bərqərar olmasına töhfəsini yüksək dəyərləndirib. Baş nazir avqustun 8-də Vaşinqtona əldə olunmuş razılaşmaların cədvəl üzrə icrasının vacibliyini vurğulayıb.
Dövlət katibinin müavini onu da qeyd edib ki, dövlət katibi köməkçisinin müavini Sonata Koulterin başçılığı ilə ikitərəfli işçi qruplar işə salınıb. Məqsədi tarixi sammitdə qəbul olunmuş ikitərəfli razılaşmaların icrası, Beynəlxalq Sülh və Rifah uğrunda Tramp Marşrutunun işlənməsidir.
14 noyabr
Paşinyan TRIPP barədə: 99, ya da 49 illiyə icarəyə verilməsi müzakirə olunur
Ermənistanın baş naziri Nikol Paşinyan deyir ki, TRIPP layihəsinin gerçəkləşməsi üçün ilk addım yazılı normativ bazanın yaradılmasıdır. Bu bazanın ilk mərhələsi isə avqustun 8-də Vaşinqtonda imzalanan bəyannamədir.
Paşinyan noyabrın 14-də "Sülh kəsişməsi: regional kommunikasiyaların inkişafı" adlı konfransda çıxış edib.
TRIPP, başqa sözlə, "Tramp yolu" Azərbaycanı Ermənistandan keçərək Naxçıvan eksklavı ilə birləşdirəcək marşrutdur.
Paşinyan deyib ki, ABŞ və Ermənistan birgə hüquqi şəxsi təsis edəcəklər. Bu birgə şirkəti direktorlar şurası idarə edəcək, həmin şurada Ermənistan və ABŞ təmsil olunacaq. Paşinyan strateji əhəmiyyətli məsələlərdə Ermənistana həlledici səs hüququ veriləcəyini təsdiqləyib.
Baş nazir ekspert qrupunda bir sualın müzakirə olunduğunu deyib: Ermənistanda fəaliyyət göstərən hər hansı qurum TRIPP marşrutunun keçəcəyi ərazilərdə hansısa məhdudiyyətlərlə üzləşəcəkmi? "Azatutyun" yazır ki, Paşinyan bu suala "xeyr" cavabını verib.
O əlavə edib ki, icarə müddəti başa çatanda torpaq sahəsindəki əmlak Ermənistanın mülkiyyətinə keçir, torpaq isə həmişə Ermənistanın mülkiyyətində qalır. Paşinyan hazırda icarə hüququnun verilməsi üçün iki ssenarinin müzakirə olunduğunu söyləyib: 99 illik və 49 illik. Paşinyan bu müddəti investisiyalarla əlaqələndirib: "Desək ki, bu torpağı beş illik veririk, heç kim pul yatırmayacaq, çünki bu investisiyanı beş ilə geri qaytarmaq real deyil".
Paşinyan onu da deyib ki, Azərbaycan prezidenti İlham Əliyev ilə Kopenhagendə Avropa Siyasi Birliyinin sammitində bu layihəni haradan başlamağı müzakirə edib. Onun sözlərinə görə, ilkin müzakirələrdən sonra elektrik xətləri və qaz kəmərinin daha sürətlə reallaşdırıla biləcəyinə razılaşıblar. Amma Paşinyan bunun ilkin anlaşma olduğunu vurğulayıb.
Nikol Paşinyan Ermənistan parlamentində
13 noyabr
Paşinyan: TRIPP-in tikintisi gələn il başlayacaq
Ermənistanın cənubundakı strateji Sünik regionunda Beynəlxalq Sülh və Firavanlıq üçün Tramp Marşrutunun (TRIPP) tikintisinə 2026-cı ilin ikinci yarısında başlanacaq. Bunu ölkənin baş naziri Nikol Paşinyan noyabrın 12-də deyib.
Paşinyan parlamentdə layihə üçün yol xəritəsini təqdim edib. "Ermənistan hakimiyyəti müəyyən gecikmələr olsa da, qrafikə əməl etməyi hədəfləyir", – o vurğulayıb.
Baş nazirin sözlərinə görə, layihənin detalları ilə bağlı razılaşmalar 2026-cı ilin birinci yarısında yekunlaşdırılacaq və ilin ikinci yarısında tikinti işlərinə başlanacaq.
TRIPP üzrə razılaşma bu ilin avqustunda Ağ evdə Azərbaycanla sammitdə əldə olunub. ABŞ prezidenti Donald Tramp layihəyə adını verərək bəyannaməni şahid qismində imzalayıb. Bəyannaməyə əsasən, Ermənistan Azərbaycanla onun Naxçıvan eksklavı arasında "maneəsiz əlaqə" təmin etməyi üzərinə götürür, bunun qarşılığında Ermənistana "beynəlxalq və ölkələrarası kommunikasiyadan qarşılıqlı faydalar" vəd olunur.
Paşinyan parlamentdə TRIPP layihəsi çərçivəsində bəzi infrastruktur planlarından danışıb. O deyib ki, dəmir yolu sovet dövründə istifadə olunan marşrut üzrə çəkiləcək, çünki yeni istiqamət üzrə inşa etmək real deyil. Qaz kəməri dəmir yolundan xeyli şimalda yerləşəcək, elektrik xətləri də həmin istiqamətdə çəkiləcək.
Avtomobil yollarına gəlincə, əsas magistral yolların mövcud Şimal-Cənub avtomagistral şəbəkəsinə inteqrasiya ediləcəyi gözlənilir. Neft kəmərinə gəlincə isə o, planların hələ təsdiqlənmədiyini və bunun qismən beynəlxalq neft qiymətlərindən asılı olacağını bildirib.
Paşinyan layihənin sürətlə gerçəkləşdiriləciyini bildirib.
Sizin brauzer HTML5-i dəstəkləmir
Əliyevlə Paşinyanın razılaşdığı 'Tramp yolu' nədir?
Sərhəd bəzi yerlərdə infrastruktura uyğun demarkasiya edilə bilər
Baş nazirin müavini Mher Qriqoryan isə bildirib ki, TRIPP layihəsinə görə Ermənistan və Azərbaycan bəzi sərhəd hissələrini qeyri-adi qaydada demarkasiya edə bilər: "Hər iki tərəfdə demarkasiya prosesini davam etdirməyə maraq var. İnfrastrukturun yerləşəcəyi məkan, onun yerinə uyğun sərhədin hansı hissələrinin demarkasiya olunması ilə bağlı spesifik danışıqlar aparılır".
AzadlıqRadiosunun erməni xidməti yazır ki, Ermənistan parlamentindəki əsas müxalifət fraksiyaları hökumət üzvləri ilə keçirilən iclası boykot ediblər. Onların mövqeyincə, Vaşinqton razılaşmaları çərçivəsində Ermənistan Sünikdəki yollar üzərində suverenliyini itirib, Azərbaycandan heç nə əldə etmir. Onlar Yerevanla Bakının parafladığı sülh sazişinə də skeptik yanaşırlar, deyirlər ki, hökumət güzəştləri davam etdirdikcə bu sənəd real sülh gətirməyəcək.
Paşinyan və hökuməti tənqidləri qəbul etmir. Onlar TRIPP-in Ermənistanın yurisdiksiyası altında qalacağını, ölkənin suverenliyini və ərazi bütövlüyünü pozmadığını deyirlər. Hökumət bildirir ki, ABŞ-nin nəzarəti altında gerçəkləşəcək layihə regiondaxili kommunikasiyanı genişləndirəcək, Azərbaycan üzərindən tranzit imkanları vasitəsilə Ermənistana iqtisadi faydalar gətirəcək.