Kubanda Azərbaycan diasporunun təmsilçisi həbs olunub
2 sentyabr
Kubanda Azərbaycan diasporunun təmsilçilərindən olan biri Şahlar Novruzov həbs olunub. Rusiya mediası "Kafe "Köhnə Bakı"" MMC və "Dar Frut" MMC-nin direktorunun 919 milyon rubl (təxminən 31 milyon manat) dəyərində daşınmaz əmlakla bağlı dələduzluq cəhdində ittiham olunduğunu yazır. Novruzovun bu il sentyabrın 26-dək istintaq təcridxanasında saxlanacağı bildirilir.
"Kommersant" məhkəmə materiallarına istinadla onun barəsində altı ay müddətinə həbs-qətimkan tədbirinin seçildiyini yazır.
Təqsirləndirilənin vəkili Aleksey Abramov məhkəmədən həbs-qətimkan tədbirinin yüngül formaya dəyişdirilməsi haqda vəsatət qaldırıb. O, Novruzovun yaşını, Krasnodarda daimi qeydiyyatda olmasını, məhkumluğunun olmadığını əsas gətirib. FSB-nin Krasnodar diyarı üzrə idarəsinin müstəntiqi isə bildirib ki, təqsirləndirilən şəxs istintaqdan yayına, cinayət fəaliyyətini davam etdirə bilər.
Peskov: Putinlə Əliyev əl sıxıblar, amma 'substantiv' ünsiyyətləri olmayıb
3 sentyabr
Rusiya və Azərbaycan prezidentləri - Vladimir Putin və İlham Əliyev salamlaşıblar, amma substantiv ünsiyyətləri olmayıb. Bunu Kremlin sözçüsü Dmitri Peskov deyib.
"Onlar Əliyevlə salamlaşıb, əl sıxıblar, amma bu dəfə hər hansı substantiv ünsiyyət olmayıb", – Peskov jurnalistlərə deyib.
Əliyev, Putin və bir sıra ölkələrin liderləri avqustun 31-i və sentyabrın 1-də Çində Şanxay Əməkdaşlıq Təşkilatının (ŞƏT) sammitinə, sentyabrın 3-də isə Pekində İkinci Dünya müharibəsinin 80-ci ildönümünə həsr olunmuş parada qatılıblar.
Putin Azərbaycanla münasibətlərdə problemlərin olduğunu etiraf edib
3 sentyabr
Rusiya prezidenti Vladimir Putin Azərbaycanla münasibətlərdə problemlərin olduğunu etiraf edib. O, Çinə səfərinin yekununda jurnalistlərin suallarını cavablandırarkən deyib: "Ölkələrarası münasibətlərdə hər zaman mövcud vəziyyətdən, siyasi konyunkturadan yaranan suallar olur. Problemlər var, amma bu gün prezident Əliyevlə salamlaşdıq, iki-üç kəlmə danışdıq. Əsaslı münasibətlər və onları inkişaf etdirməyə qarşılıqlı maraq hər şeyi yerinə qoyacaq".