2025-ci il Vatslav Havel Mükafatı ukraynalı jurnalist və insan haqları müdafiəçisi Maksim Butkeviçə verilib.
M.Butkeçiv çıxışında onunla qısa siyahıda yer alan həmkarları - Mziya Amağlobeli və Ülvi Həsənlinin adlarını vurğulayıb, onların tezliklə azadlığa buraxılması arzusunu dilə gətirib: "Onlar söz azadlığını, ifadə azadlığını, müstəqil düşüncə hüququnu müdafiə edirlər və avtoritar rejimlərin repressiyalarına məruz qalırlar".
Rusiyanın Ukraynadakı təcavüzkar müharibəsindən danışan jurnalist əlavə edib: "Ukrayna təkcə ərazi bütövlüyünü deyil, həm də fundamental dəyərləri müdafiə edir. Əməkdaşlığımız, azadlığımız və qarşılıqlı hörmət içində, ləyaqətlə və qorxusuz yaşamaq istəyimiz məhz bu dəyərlərə əsaslanır".
Ü.Həsənlinin xanımı Rübabə Quliyeva bugünkü mərasimə buraxılmadığından onun çıxışını "AbzasMedia"nın direktoru və baş redaktoru vəzifəsini icra edən Günel Səfərova səsləndirib. O, Ü.Həsənlinin həqiqətə, azadlığa və xalqı üçün ədalətə inandığı üçün həbsdə olduğunu deyib: "2025-ci ilin iyununda hakim ona 9 il həbs cəzası kəsməzdən öncə o demişdi: "Həbs ümidsizlik deyil. Həbs zülm deyil. Mübarizə davam edir. Həqiqət bizimlədir". Bu sözlər mənə hər gün güc verir", – R.Quliyevanın çıxışında deyilir.
O, həmçinin "AbzasMedia işi" üzrə həbsdə olan nəşr əməkdaşlarının – Sevinc Vaqifqızı, Nərgiz Absalamova, Elnarə Qasımova, Hafiz Babalı və Məhəmməd Kekalovun, eləcə də AzadlıqRadiosunun əməkdaşı və iqtisadçı Fərid Mehralızadənin adlarını çəkib.
Çıxışda Azərbaycanda azı 360 siyasi məhbusun 25-dən çoxunun jurnalistlər olduğu vurğulanıb.
28 sentyabr
Ülvi Həsənlinin xanımı ölkədən buraxılmadı
"AbzasMedia" nəşrinin həbsdə olan direktoru Ülvi Həsənlinin xanımı Rübabə Quliyevanın ölkədən çıxışına məhdudiyyət qoyulub.
Quliyeva sentyabrın 28-də həyat yoldaşının finalçılarından biri olduğu Vatslav Havel İnsan Haqları Mükafatının təqdimetmə mərasimində iştirak etmək üçün Strasburqa getməli idi. Lakin hava limanında pasport yoxlanışı zamanı ona Daxili İşlər Nazirliyinin (DİN) ölkədən çıxışına qadağa qoyduğu söyləndiyi bildirilir. Qadağanın hansı işlə bağlı olduğu barədə isə heç bir izahat əldə etmək mümkün olmayıb
R.Quliyeva məsələ ilə bağlı Bakı şəhər Baş Polis İdarəsinin Ağır cinayətlərin istintaqı şöbəsinin müstəntiqi Samir İsmayılovla əlaqə saxladığını, lakin müstəntiqin vəziyyətdən xəbərsiz olduğunu və araşdırma aparılacağını dediyini bildirib.
Ülvi Həsənli
26 avqustÜlvi Həsənli Vatslav Havel Mükafatına namizədlərin qısa siyahısına salınıb
Avqustun 26-da Vatslav Havel İnsan Haqları Mükafatının seçim komitəsi 2025-ci il mükafatı üçün qısa siyahıya düşən namizədlərin adlarını açıqlayıb.
"AbzasMedia" korrupsiya araşdırmaları nəşrinin həbsdə olan direktoru Ülvi Həsənli üç namizəddən biridir.
Vatslav Havel Mükafatının Avropada və onun hüdudlarından kənarda insan haqlarının müdafiəsi sahəsində müstəsna vətəndaş cəmiyyəti fəaliyyətinə görə verilir.
Digər iki namizəd gürcüstanlı jurnalist, "Batumelebi" və "Netqazeti" müstəqil nəşrlərinin həmtəsisçisi Mzia Amağlobeli və ukraynalı jurnalist Maksim Butkeviçdir.
Avropa Şurasının yaydığı press-relizdə deyilir ki, Ü.Həsənli 2016-cı ildən "AbzasMedia"nın direktorudur. O, 2011-ci ildən hökumətin davamlı təqiblərinə məruz qalıb, buraya əsassız həbslər, işgəncələr və siyasi motivli ittihamlar daxildir: "Hazırda uzaq bölgədə ağır şəraitli bir həbsxanada saxlanılır. O, həbsdə aclıq aksiyaları keçirib, cərimə kamerasına salınıb. Amma qətiyyət, mətbuat azadlığına sadiqlik göstərməkdədir".
Vatslav Mükafatının qalibi sentyabrın 29-da AŞPA-nın payız sessiyasında açıqlanacaq. 2014-cü ildə bu mükafata azərbaycanlı hüquq müdafiəçisi, hazırda həbsdə olan Anar Məmmədli layiq görülüb.
Mükafat 60 min avrodan, kubok və diplomdan ibarətdir.
M.Amağlobelinin siyasi motivlərlə həbs olunduğu, Gürcüstanda etirazlarda pis rəftarı ifşa edəndən sonra özünün sərt münasibətlə üzləşdiyi bildirilir.
M.Butkeviç isə jurnalist, insan haqları fəalıdır. Moskva Ukraynaya qarşı müharibəyə başlayandan sonra Rusiya qüvvələri onu ələ keçirib, 13 il həbsə məhkum edib. O, 2024-cü ilin oktyabrında məhbus mübadiləsi ilə azad edilib.
Xatırlatma
Ülvi Həsənli "AbzasMedia"dan digər həmkarları ilə birlikdə qaçaqmalçılıq, vergidən yayınma və digər ittihamlarla həbsdədir. Ona, nəşrin baş redaktoru Sevinc Vaqifqızı, araşdırmaçı-jurnalist Hafiz Babalı və Azadlıq Radiosunun jurnalisti, iqtisadçı Fərid Mehralızadəyə 9 il, jurnalistlər Nərgiz Absalamova və Elnarə Qasımovaya 8 il, "AbzasMedia"nın koordinatoru Məhəmməd Kekalova isə 7 il 6 ay həbs cəzası kəsilib. Jurnalistlər və müdafiəçiləri istintaqın ortaya tutarlı sübutlar qoymadığını bildirib.
2023-cü ilin noyabrından başlayaraq Azərbaycanda qruplar halında 30-dan çox jurnalist, ictimai fəal qaçaqmalçılıq ittihamı ilə həbs edilib. Yerli hüquq-müdafiə təşkilatlarının hazırladığı siyahılara görə, hazırda Azərbaycan həbsxanalarında 370-dən çox siyasi məhbus var. Rəsmilərsə, bir qayda olaraq, vurğulayırlar ki, ölkədə heç kim peşə fəaliyyəti ilə bağlı, siyasi əsaslarla həbs edilmir. Onlar iddia edirlər ki, həmin siyahılarda adları yer alanlar törətdikləri əmələ görə cinayət məsuliyyətinə cəlb olunublar. Amma beynəlxalq insan haqları qurumları da hökuməti haqsız tutulanları azad etməyə çağırıb.