Ukrayna Ali Radası noyabrın 19-da ədliyyə naziri Qerman Qaluşşenkonun istefasına səs verib. Onun adı enerji sektorunda korrupsiya ilə bağlı hallanır. İstintaqı Milli Antikorrupsiya Bürosu (NABU) aparır.
Radada mütləq çoxluq, 323 deputat istefanın lehinə səs verib. Deputatlar energetika naziri Svitlana Qrinçukun istefasına da səs veriblər.
Onların heç biri parlamentin iclasına gəlməyib.
18 noyabr
Müxalifət Ukrayna Radasının işini pozub. Korrupsiya qalmaqalı böyüyür
Noyabrın 18-də Ukraynada "Avropa Həmrəyliyi" müxalifət fraksiyasının deputatları Ali Radanın işini pozublar. Parlament ədliyyə naziri Qerman Qaluşşenko və energetika naziri Svitlana Qrinçukun vəzifədən azad olunması məsələsinə baxmalı idi.
Fraksiya lideri Petro Poroşenko bildirib ki, o və tərəfdarları "buxarı buraxmaq və korrupsiya vertikalını qorumaq" cəhdinə yol verməyəcək, buna səs verməyəcəklər. Poroşenko əlavə edib ki, "Avropa Həmrəyliyi" hökumətin istefası üçün imza toplamağa başlayıb, - "Ukrainska Pravda" belə yazır.
Spiker Ruslan Stefançuk fasilə elan edərək fraksiya və qrup liderlərini məsləhətləşməyə dəvət edib.
AzadlıqRadiosunun Ukrayna xidməti qeyd edir ki, bundan öncə "Avropa Həmrəyliyi" fraksiyası "Qolos" müxalif fraksiyası ilə birlikdə parlamentdə yeni koalisiya formalaşdırmağa çağırıb.
Bütün bunlar energetika sektorunda genişmiqyaslı korrupsiya araşdırmaları fonunda baş verir. Ukrayna prezidenti Volodimir Zelenski nazirlər Qaluşşenko və Qrinçukun istefasını Radanın gündəminə çıxarıb. Ölkədə "Kvartal 95" studiyasının həmtəsisçisi, Zelenskinin keçmiş biznes ortağı Timur Mindiç ətrafında korrupsiya qalmaqalı yaşanır.
100 milyon dollarlıq mənimsəmə sxemi
Noyabrın 10-da istintaq orqanları Mindiçin evində axtarış aparıb. Bir qədər sonra Milli Antikorrupsiya Bürosu (NABU) Ukrayna AES-lərinin operatoru "Energoatom" şirkətində genişmiqyaslı mənimsəmə sxeminin aşkarlandığını bildirib. NABU-nun məlumatına görə, bu sxem vasitəsilə 100 milyon dollar leqallaşdırılıb.
İstintaqın versiyasına görə, Mindiç bu cinayət sxeminin qurucusu, əsas benefisiarlarından olub. Hazırda iş üzrə səkkiz nəfərə ittiham irəli sürülüb, onlardan beşi həbs olunub.
Prezident Zelenski antikorrupsiya orqanlarının fəaliyyətini dəstəkləyib, günahkarların cəzalandırılmasını tələb edib. Noyabrın 13-də o, Mindiçə və maliyyəçi Aleksandr Tsukermana sanksiyalar tətbiq edib. Onların heç biri Ukraynada deyil. Mindiçin axtarışdan bir neçə saat öncə ölkədən çıxdığı bildirilib.
Qaluşşenko da axtarışa məruz qalıb. O, 2025-ci ilin iyuluna qədər energetika nazirliyinə rəhbərlik edib. NABU-nun istintaqından dolayı o, vəzifəsinin icrasından kənarlaşdırılıb, daha sonra istefa ərizəsi təqdim edib. Qrinçuk da istefa ərizəsi yazıb.
Deputatın Yermakla bağlı iddiası
Yayda Zelenski NABU və SAPO-nun (İxtisaslaşdırılmış Antikorrupsiya Prokurorluğu) müstəqilliyini kəskin azaldacaq qanun layihəsini dəstəkləyib. Bu böyük etirazlara səbəb olub və prezident geri çəkilib.
Noyabrın 18-də isə bir ukraynalı deputat iddia edib, korrupsiya qalmaqalı üzrə istintaq materiallarında adı kodlaşdırılmış şəxs Zelenskinin prezident administrasiyası rəhbəridir.
Deputat Yaroslav Jeleznyakın sözlərinə görə, sənədlərdə Andrey Yermakın rəsmilərə NABU əməkdaşları ilə bağlı araşdırma aparmaq tapşırığı verdiyi iddia olunur.
Yermak AzadlıqRadiosunun Ukrayna xidmətinin şərh sorğusuna cavab verməyib.
Bu ittihamlar ukraynalıların Rusiyanın dörd ilə yaxındır apardığı tammiqyaslı işğaldan yorulduğu bir dönəmdə gündəmə gəlir. Bu arada Ukrayna rəsmiləri ölkənin enerji infrastrukturunu qorumağa, əhalinin soyuq qış aylarında donmamasını, qaranlıqda qalmamasını təmin etməyə çalışırlar.