Cəbhədə vəziyyət gərgin olaraq qalır
Oktyabrın 15-i gün ərzində və 16-na keçən gecə cəbhənin Ağdərə-Ağdam, Füzuli-Hadrut istiqamətlərində vəziyyətin yenə də gərgin olaraq qaldığı bildirilir.
Bu barədə Azərbaycan Müdafiə Nazirliyi (MN) oktyabrın 16-sı saat 9:19-da məlumat yayıb.
Məlumatda yazılıb ki, işğaldan azad edilmiş Cəbrayıl, Hadrut istiqamətlərində yerləşən Azərbaycan bölmələrinin mövqelərini, eləcə də cəbhə xəttinə yaxın kəndləri qarşı tərəf oktyabrın 15-də gün ərzində raket, artilleriya və minaatanlardan atəşə tutub. MN-in bildirməsinə görə, gecə ərzində cəbhənin bəzi istiqamətlərində qarşı tərəf fəallaşmağa cəhd göstərib, amma bunun qarşısı alınıb.
47 mülki şəxs həlak olub, 222-i yaralanıb
Azərbaycan Baş Prokurorluğunun mətbuat xidməti bu gün, oktyabrın 16-də cəbhədə mülki əhalinin itkiləri ilə bağlı növbəti açıqlama yayıb.
Qurumun məlumatına görə, sentyabrın 27-dən (cəbhədə döyüşlər başlayandan) hazırkı vaxtadək Ermənistan silahlı qüvvələrinin yaşayış məntəqələrini atəşə tutması nəticəsində Azərbaycan tərəfdən 47 mülki şəxs həlak olub, 222 nəfər yaralanıb: "Bundan başqa, 301 mülki obyekt, 84 yaşayış binası və 1669 yaşayış evi yarasız hala düşüb".
'Ordubad rayonuna raket zərbəsi endirilib'
Ermənistan silahlı qüvvələrinin Ordubad rayonu ərazisinə raket zərbəsi endirdiyi bildirilir.
Bu barədə Azərbaycan Müdafiə Nazirliyi (MN) oktyabrın 16-da saat 13:35-də məlumat yayıb.
"Ermənistan silahlı qüvvələrinin işğal olunmuş Qubadlı rayonu ərazisindən oktyabrın 15-də saat 10:44-də atdığı əməliyyat-taktiki raket Naxçıvan Muxtar Respublikasının Ordubad rayonu ərazisində partlayıb. Dinc sakinlərə və mülki obyektlərə zərər dəyməyib", - məlumatda yazılıb.
Pompeo Qarabağa 'barıt çəlləyi' deyir
Dağlıq Qarabağdakı separatçı rejim bu gün daha 29 əsgərinin öldürüldüyünü bildirib. Beləliklə, sentyabrın 27-dən gedən döyüşlərdə həlak olmuş Ermənistan əsgərlərinin sayı 633-ə çatıb. Xəbəri "Reuters" yayıb.
ABŞ Dövlət katibi Mayk Pompeo isə deyir ki, Türkiyə Azərbaycanı resursla təmin etməklə münaqişəni daha da ağırlaşdırır. "WSB Atlanta"ya müsahibəsində Pompeo qeyd edib ki, münaqişənin diplomatik həllinə ehtiyac var, nəinki "üçüncü tərəf ölkələrin barıt çəlləyini daha da alovlandırmasına".
Türkiyə isə NATO müttəfiqlərinin tənqidlərini rədd edir, Ermənistanı Azərbaycan ərazisinin işğalına görə ittiham edir.
XİN-dən ABŞ Dövlət katibinə etiraz
"Amerika Birləşmiş Ştatlarının Dövlət katibi Mayk Pompeo bu ilin 15 oktyabr tarixində "WSB Atlanta" televiziya kanalında "Erik Erikson Şou" verilişində səsləndirdiyi fikirlər sırasında Ermənistan-Azərbaycan Dağlıq Qarabağ münaqişəsinə də toxunub. Azərbaycan tərəfi hesab edir ki, ABŞ Dövlət katibinin fikirləri ABŞ hökuməti tərəfindən münaqişə ilə bağlı bundan öncə edilmiş çoxsaylı rəsmi bəyanatlara uyğun deyil".
Bu barədə Azərbaycan XİN-dən daxil olan məlumatda bildirilir.
"Bu fikirlər həmçinin, ABŞ-ın, ATƏT-in Minsk qrupunun həmsədr ölkələrindən biri kimi, statusuna uyğun gəlmir", - açıqlamada vurğulanıb.