BBQ: Silah təchizatı və tranziti dayandırılsın
Beynəlxalq Böhran Qrupu (BBQ) oktyabrın 14-də Dağlıq Qarabağ münaqişəsi ilə bağlı daha bir bəyanat yayıb. Qurum oktyabrın 2-də münaqişənin sadə həllinin olmadığını deyirdi. Rusiyanın vasitəçiliyi ilə əldə olunan atəşkəs razılaşmasının iflasından sonra döyüşlər qızışmaqdadır.
BBQ tərəfləri mülki şəxsləri hədəfə almağı dayandırmağa, humanitar əziyyəti önləmək və azaltmaq üçün çalışmağa çağırır. Qurumun mövqeyinə görə, ATƏT-in Minsk qrupu daxil olmaqla beynəlxalq oyunçular bir səslə danışmalıdırlar. Tərəflərə silah verən ölkələr silah təchizatını və tranzitini dayandırmalıdırlar.
Qurum BMT-nin Təhlükəsizlik Şurasının oynaya biləcəyi rola toxunur. İndiyədək bircə dəfə yığışaraq bəyanat vermiş qurum təcili açıq toplantı keçirməli, tərəfləri 10 oktyabr atəşkəs razılaşmasına əməl etməyə çağırmalıdır. "Şura qətnamə qəbul edərək Moskvada razılaşdırılmış humanitar atəşkəsdən sonra təcili və hərtərəfli atəşkəsə səsləməlidir. Qətnamədə tərəflərin mülki şəxslərin həyatını təhlükəyə atması pislənilməli, onlar Minsk qrupunun həmsədrlərinin vasitəçiliyi ilə danışıqlara qayıtmağa çağrılmalıdır", – qurum vurğulayır.
Azərbaycan tərəfi mülki deyil, legitim hərbi obyektləri hədəfə aldığını bildirir. Ermənistan da mülki hədəfləri vurmadığını qeyd edir.
Rəsmi Bakı ATƏT-in Minsk qrupunun vasitəçiliyi ilə 30 ilə yaxındır aparılan danışıqların fayda vermədiyini düşünür, BMT-nin Azərbaycan torpaqlarının işğaldan azad olunmasına çağıran dörd qətnaməsinin yerinə yetirilməsini tələb edir.
Mülki əhalidən ölü sayı 46-ya çatıb
Ermənistan silahlı qüvvələrinin bu gün, oktyabrın 15-də Tərtər qəbiristanlığını atəşə tutması nəticəsində üç mülki insanın həlak olduğu, beşinin isə yaralandığı bildirilir.
Bu barədə Baş Prokurorluğun mətbuat xidmətinin məlumatında bildirilir. Qurumdan verilən məlumata görə, saat 13 radələrində qarşı tərəfin Tərtər şəhər qəbiristanlığını dəfn mərasimi keçirilərkən qəsdən ağır artilleriyadan atəşə tutması nəticəsində orada olan üç nəfər həlak olub: "Məmmədov Fizuli Əli oğlu, Əmirov İsgəndər Yelmar oğlu, Allahverdiyev Elsevər Vəli oğlu, Əmirov Nofəl Yelmar oğlu və Qəzənfərli Rəfael Qəzənfər oğlu isə müxtəlif dərəcəli bədən xəsarətləri alaraq xəstəxanaya yerləşdiriliblər".
Qurumdan bunda öncə isə bildirmişdi ki, sentyabrın 27-dən (cəbhədə döyüşlər başlayandan) hazırkı vaxtadək Ermənistan silahlı qüvvələrinin yaşayış məntəqələrini atəşə tutması nəticəsində Azərbaycan tərəfdən 43 mülki şəxs həlak olub, 218 nəfər yaralanıb.
Prezident 6 kəndin də işğaldan azad olunduğunu açıqladı
Azərbaycan prezidenti İlham Əliyev bu gün, oktyabrın 15-də 6 kəndin işğaldan azad edildiyini açıqlayıb.
"Rəşadətli Azərbaycan Ordusu tərəfindən Füzuli rayonunun Arış, Cəbrayıl rayonunun Doşulu, Xocavənd rayonunun Edişə, Düdükçü, Edilli, Çiraquz kəndləri işğaldan azad edilib...", - o, Twitter səhifəsində yazıb.