Erdoğan Putinlə Qarabağı müzakirə edib
Türkiyə və Rusiya prezidentləri Recep Tayyip Erdoğan və Vladimir Putin arasında Qarabağa və başqa münaqişələrə dair telefon söhbəti olub.
Rusiyanın RIA Novosti saytının xəbərinə görə Erdoğan Putinə zəng edib.
Kremlin bu söhbət barədə verdiyi məlumatda deyilir:
"Dağlıq Qarabağ münaqişə bölgəsindəki vəziyyət təfərrüatı ilə müzakirə olunub. Hər iki tərəfdən oktyabrın 10-da Moskvada razılaşdırılmış humanitar atəşkəsə riayət edilməsinin mühümlüyü təsdiq olunub. Vladimir Putin və Recep Tayyip Erdoğan ATƏT-in Minsk qrupunun əldə etdikləri də daxil siyasi prosesin fəallaşdırılmansına tərəfdar olduqlarını bildiriblər”.
Rusiya xəbərlərində olmayan məqam
RİA Novosti yazır ki, Rusiya prezidenti bu söhbət zamanı hərbi əməliyyatlarda Yaxın Şərqdən olan yaraqlıların iştirakı ilə bağlı narahatlığını ifadə edib:
"Dağlıq Qarabağ probleminin tezliklə dinc yolla tənzimlənməsi və qan tökülməsinin qarşısının alınması üçün birgə səylərin zəruriliyi vurğulanıb. Türkiyənin ATƏT-in Minsk qrupunun üzvü kimi münaqişənin deeskalasiyasına konstruktiv töhfə verəcəyinə ümid ifadə olunub”.
Erdoğan və Putin habelə ölkələrinin qarşı durduğu Suriya və Liviya münaqişələrini də müzakirə ediblər.
Türkiyə xəbər agentliklərinin məlumatında Rusiya xəbərlərində yer almayan mühüm bir məqam var.
TRT saytı xəbər verir ki, bu telefon danışığında prezident Erdoğan Ermənistanın Azərbaycan torpaqlarının 30 ildir davam edən işğalını daimiləşdirmək istədiyini bildirib.
O deyib ki, Türkiyə istər Minsk qrupu, istərsə də Rusiya ilə ikitərəfli əlaqələr çərçivəsində münaqişənin davamlı həllinin əldə olunmasına tərəfdardır.
Dövlət katibi Pompeo Qarabağ barədə suala cavab verib
Oktaybrın 14-də ABŞ dövlət katibi Mike Pompeonun keçirdiyi mətbuat brifinqində ona Azərbaycan və Ermənistan arasında Dağlıq Qarabağ münaqişəsi ilə bağlı adminsitrasiyanın nə kimi addımlar atdığı barədə sual verilib.
Mike Pompeo deyib:
“Mən bu barədə gedən söhbətlərə və getməkdə davam edəcək söhbətlərə müdaxilə etmək istəmirəm. Lakin bunu deməyi kafi sayıran ki, mən bu səhər prezident Donald Trump-la bu barədə qısaca söhbət etmişəm. Biz orada baş verənləri izləyirik. Biz münaqişənin çözülməsinin başlanğıcı kimi orada atəşkəsin olması üçün müraciət etmiş Avropa müttəfiqlərimizə və dünyanın bir çox ölkələrinə qoşulmuşuq. Biz orada mülki şəxslərin ölümü barədə xəbərləri izləyirik. Biz Türkiyənin Azərbaycanı gücləndirdiyini görürük. Biz bütün beynəlxalq oyunçulardan bu regiondan aralı durmağa, fəlakəti artırmamağa çağırmışıq. Biz bu istiqamətdə işləyirik. Biz sakitliyin, atəşkəsin və beynəlxalq qanunlar əsasında nəticənin əldə olunması üçün diplomatik alətlərimizdən istifadə edirik”.
Mike Pompeo əlavə edib ki, ABŞ administrasiyası onun sadaladığı məqsədlərə “nail olunmasını asanlaşdıracaq müəyyən iş” görüb.
O bu işin konkret olaraq nədən ibarət olduğunu açıqlamayıb.
Peskov: “Müdafiə Nazirliyimiz bu informasiyanı yoxlayır…”
Rusiya prezidenti Vladimir Putinin sözçüsü Dmitri Peskov oktyabrın 14-də mətbuat üçün keçirdiyi gündəlik brifinqdə Dağlıq Qarabağda hərbi əməliyyatlar barədə suala cavab verib:
"Biz bununla (Dağlıq Qarabağda atəşkəsin pozulması-red) bağlı yalnız narahatlıq ifadə edə bilərik. Biz hesab edirik ki, hərbi əməliyyatlar mümkün qədər tez dayanmalıdır. Biz münaqişəni siyasi-diplomatik tənzimləmə metoduna keçirməliyik”.
RIA Novosti agentliyinin xəbərinə görə Dmitri Peskov Azərbaycanın Ermənistan ərazisinə zərbə endirməsinə dair xəbərlə bağlı isə bunu deyib:
“Bizim Müdafiə Nazirliyimiz bu informasiyanı yoxlayır. Onlar hər iki tərəfdən olan həmkarları ilə daimi əlaqədədir”.
"Qarşı tərəf geri çəkilməyə məcbur edilib"
AMN bildirib ki, qarşı tərəf cəbhənin müxtəlif istiqamətlərində geri çəkilməyə məcbur edilib: "Humanitar atəşkəs rejiminə əməl edən qoşunlarımız bütün cəbhə boyu əməliyyat üstünlüyünü saxlayır".
Halbuki, Rusiyanın vasitəçiliyi ilə Azərbaycan və Ermənistan Xarici İşlər nazirləri oktyabrın 9-u və 10-da Moskvada danışıqlar apararaq atəşkəs barədə sənəd imzalamışdılar. Həmin sənədə görə, oktyabrın 10-u saat 12-dən cəbhədə tərəflər arasında atəşkəs əldə edilməliydi.