7 Tərtər sakini də xəsarət alıb
Ermənistan silahlı qüvvələrinin Tərtər rayonunu atəşə tutması nəticəsində 7 mülki şəxsin də xəsarət aldığı bildirilir.
Bu barədə oktyabrın 14-də Azərbaycan Baş Prokurorluğu məlumat yayıb.
Məlumatda yazılıb ki, oktyabrın 14-də qarşı tərəfin silahlı birləşmələri Tərtər rayonunu müxtəlif istiqamətlərdən intensiv raket və ağır artilleriyadan atəşə tutublar.
Qurum qeyd edib ki, saat 10 radələrində Tərtər rayonu ərazisində orta məktəbin həyətinə mərmi düşüb. Nəticədə Tərtər rayon İcra Hakimiyyəti başçısının Düyərli kənd nümayəndəsi Ramiz Zeynalov, Əsgərli kənd nümayəndəsi Kamran Əhmədov və daha 5 sakinin müxtəlif bədən xəsarətləri alaraq xəstəxanaya yerləşdirildikləri vurğulanıb.
Xəsarət alanların sayı 214-ə çatıb
Azərbaycan Baş Prokurorluğunun mətbuat xidməti oktyabrın 14-də mülki əhalinin itkiləri ilə bağlı növbəti açıqlama yayıb.
Qurumdan verilən məlumata görə, sentyabrın 27-dən (cəbhədə döyüşlər başlayandan) hazırkı vaxtadək qarşı tərəfin silahlı qüvvələrinin yaşayış məntəqələrini atəşə tutması nəticəsində Azərbaycan tərəfdən 43 mülki şəxs həlak olub, 214 nəfər yaralanıb: "Bundan başqa, 277 mülki obyekt və 1505 yaşayış evi, 66 çoxmərtəbəli yaşayış binası yarasız hala düşüb".
Lavrov Qarabağda sülhməramlılardan danışır
Rusiyanın Xarici İşlər naziri Sergey Lavrov Qarabağda təmas xəttinə rusiyalı hərbi müşahidəçilərin yerləşdirilməsini düzgün addım sayır. Ancaq onun sözlərinə görə, buna Bakı və Qarabağ qərar verməlidir. Bu haqda "Reuters" yazır.
Lavrov həmçinin, Türkiyən münaqişədə tutduğu mövqe ilə razılaşmadığını bildirib. Onun sözlərinə görə, Türkiyə Qarabağdakı hərəkətlərində şəffaf olmalıdır.
Ankara hərbi əməliyyatlarda Bakını dəstəkləyir.
Ağdamda xəsarət alan var
Bu gün, oktyabrın 14-ü Ağdam rayonu, Çəmənli kəndində bir sakinin evinə mərmi düşməsi nəticəsində xəsarət aldığı bildirilir.
Bu barədə Baş Prokurorluqdan məlumat yayılıb.
Məlumatda yazılıb ki, Ağdam rayonu müxtəlif istiqamətlərdən intensiv raket və ağır artilleriyadan atəşə tutulub: "Saat 12 radələrində Ağdam rayonu, Çəmənli kəndində fərdi yaşayış evinə mərmi düşməsi nəticəsində 1964-cü il təvəllüdlü Soltanov Saleh Eldar oğlu müxtəlif dərəcəli bədən xəsarətləri alaraq xəstəxanaya yerləşdirilib, yaşayış evinə isə ciddi ziyan dəyib".
Baş Prokurorluq bundan əvvəl bildirmişdi ki, sentyabrın 27-dən (cəbhədə döyüşlər başlayandan) hazırkı vaxtadək Ermənistan silahlı qüvvələrinin yaşayış məntəqələrini atəşə tutması nəticəsində Azərbaycan tərəfdən ümumilikdə 43 mülki şəxs həlak olub, 214 nəfər yaralanıb.